Piše: Darinka Martinčić
Kad se j otrok rodil užanca ga j bila poć videt. Vaje se j počelo ugajat kemu spodabja, ma najprvo je bila užanca reć „Ne budi mu ča kako j’ fanjski!“ Neka mu Bog da sreću da naraste zdrav i čitovat, jak i krepak da more sako delo
delat. I za žensku je dobro da ima krepke noge za breme oprtit.
I kad je prišlo vreme od školi i školani bilo je sakakoveh pogovori. Jedan otrok da ima trdu baticu da ne moreš niš vanju stavit, drugi da j’ pak šupe glavi pa mu se ča čuje pasa na jeno uho nuntra na drugo van… frkolason da j’ namisle samo kumedija. Ki se ni otel vadit, su mu pretili da će poć cestu mest i (zemju grest) kanali kopat. Ma pravi šegavci se vavek prorivaju, a najboje pasuju onisti ki imaju dobru žbatulu. Takovi su kada bi bili finili kakovu veću školu počeli rabit, kako bi se bilo reklo učene besede pa su njin se rugali da se prenavjaju, da su pritendine i šprlentine.
Kad je prišla premošćina judi su počeli nabavjat auti. Prišal je tako na glas novi zanat – automehaničari. Neka mat da j govorila hćere neka gleda da mladić ima pod nohti črno blato, a ne kako zidarićini.
Sakemu su se iskale falinge. Ki ni prešegav da j od zada zapućen, ki je ofendjiv da j finega nosa, ki j zajičav i lajav lahko zajde va intrigu, a je jih ki se radi za niš naprče pa podase gledaju i rit ti obrnu . I va familijah je sega. Reče se da jedan vavek mora bit kuco da do griži ne pride. Gledalo se j da va kuće bude reda i šesta, na sačeren se j moralo šparat, i gledat prikoristit saki solat. Za kuće va keh j’ vladala objest i lakomija, bi bili rekli da ča misle ti judi, ča te se va kundot znest.
Bilo j’ vavek i bolneh i bolihaveh, mekušasteh i meškinasteh, debuleh i gingaveh.
Bilo j’ febri i kihavca, škrlatine i ruzmatizma, jetike i šjatike, križa i pokori. Srećan je bil ki j’ nase prišal, reklo se je da j’ abrival, da se j’ refal i okoveral.
Od otročića do starca – koliko je i kakovega dobra i zla rabilo prekonjat. Dobni i vremešni judi vavek radi mere mej sobun koliko j’ ki odnemogal i koliko j’ ki ostarel i vavek je dobro dokle j’ on drugi hujii. Pa povedaju kako je jedan naglo
obelel, drugi pak po sensega oplešivel. Pepa da se j’ nekako brižna sa prignula, a Katica grdo nagrišpala. Jovanin da slabo čuje, a Ninotu da j’ cukar vid dešval.
Najhuje je pak kad se za nekega počne govorit da j’ zgubjen, da ne tendi, da j’ šal na ocat..
Vavek su se judi lementali i kojonali, batajali su se kako su mogli i znali, štrapacali su i uživali, nekako su se inžinjali.