Piše: J.O.Hrvatin
Kuda se hodi u prirodi rabi gledat za sobu i pred sobu, zagledivat livo i desno. Rabi si zapoštat vrhe, pute i staze i kamo nas pelju. Za ne zać, za ne se gubit triba znat „zaokružit“ za se vrnit na isto mesto, samo z druge strani magar pasat popriko, po bližnjici. Oči vidiju, a u glavu ostanu slike, spomini na grčast jasen i pod njin veći kamik, na tri bore zgora staze, ali debelu bukvu.
Za zapoštat soj položaj se rabi sako malo ubrnit pa kada se vrnjamo ćemo znat kuda smo pasivali. Navadit ćemo se raspoznavat ko su staze ud divjega blaga ali ud ljudi ki su tuda pasivali pred malo ali i puno let prvo.
A more nas kakov put i prevarit ko je ud vlake po koj su vlačili drva aš ne pelje kamo smo tili.
Priroda se minja, zaraste, a po zimi tega ni. Zato rabi hodit i hodit po isti stazi i istemu putu u različito vrime leta. Kraj ni jednak u spomladi, po leti ali najesen kada je po stazah suho veje, ali po zimi kada snih se pokrije. Za poć u goru je lipo sam pohajat ma reču da je oprez majka mudrosti.
Pasal san jedanput po leti po putu poli Ujčićeve gmajne u munsku goru pa poli Osika malo ravno dalje. Vrh Komice kemu Starojci reču Tusor (901 m.n.m) je ostal zgora. Šal san da gren vidit kadi još nisan bil, med munsku Jančariju i pašku Buričinu.
Do dna je sve niže. Znal san da mi je desno vrh Jančarije, a vidilo se je i po temu aš kudagod je peljal put, jeno petsto metri, je desno smiron bila velika strmina ma i livo proti Jankovcu. Kuda san hodil je tišina kakovu još nisan bil oćutil. Ne čuje se aute ni vlak, morda samo avion. I kako se orijentirat u temu klancu?
Po takovemu putu rabi hodit jedino ako je kumpanija, ne sam.
Prišal san van na križanje puta ki pride ud žijanskih Velikih Paleži proti Paški gori, Javorini i Buričini, a križa se s puton za nazda u Munsku dragu. Znal san da moran poć desno po putu, sada z druge strani Jančarije pa u dno. Put nas pelje h lovački kućici u Munsku dragu, lovci su njoj zrekli Voćar. Skrenil san desno i priko livad prišal nazda na put pred Osikon. Tako san ubašal Jančariju.
Bili smo u lov 1974. leta z auton fićoton RI-207-12 , tata, Božo, Ristić, Tomaš i ja. Šli smo z dva auta aš je udzada doma na Lisinu veća strmina puta. Aute smo pustili pred lovačku hišicu LD “Lane” Opatija. Bilo je popodne. Od auti smo šli po putu kih četiresto metri do vrha Šije. Žnjega se vidi livo dolina i put za u Lanišće. Dolina je ogromna pa je malo reć da je veličanstven pogled odzgora.
Poli jenega grčastega jasena smo zavili desno doli po putu u Žijanske livade u dno, pa se ustavili. Božo je produžil po stazi niže. Vadili su me da lovac vavik čeka drugega na mesto ko se dogovori. Tata i Božo su se bili dogovorili da ko bu Božo prvo nas pasal nazad potlje lova da će prekrižit dvi vejice – friške utkinjene kite, položene na sred puta. Pokazal je i kadi.
Tata i ja zavili smo ud tega mesta livo, ja san ustal prvi, a on je šal malo dalje. Nič nismo dočekali, vrime se je počelo kvarit, krmaučit, strašit. Zduga ud Lanišća proti Žijanon je nosilo grmljavinu, kot da se ublaki premešćaju. Pripravljal se je pravi letnji pljusak. Niže nadesno ud mene se je čulo da je Božo pucal. Pomislili smo se da će ča bit.
Oca još ni bilo. Ni me bilo strah, društvo ti dava sigurnost. U goru se brže zamrači, još se vidi, ura je blizu sedme navečer, ali vrime straši. Prišal je i smo se vrnili na put. Vejic ni bilo i utac me je zadužil čekat Božota, a on da gre pomalo gori. Zaškurilo se je. Božota ni, ja čekan, po meni teče, pušku san ubrnil na doli, kundak gori, da daš ne teče u cijev. Još san priko pol ure počekal. Bila je, kako bi mama rekla, črna škurava.
Odzgora mene, z vrha niki puca, čekan dalje. Kada je za pet do deset minut još zapucalo, san razumil da moran poć gori. Tapal san korak po korak po jarku ma puta nisan ni malo jasno vidil. Hodil san po sumnju (po sjećanju). Desno i livo ud mene je put oko dva metra usičen u teren. Bil san si zapoštal da san po njemu pasival, samo doli, a sada san moral poć gori. Tako san dotapal do ravne čistine, i kolikogod je bila mračna, je bila svitlija ud okolice. Znal san ač
san po danu gledal se okoli sebe i da smo se po stazi spustili livo na tu čistinu, pa san sada po škuremu z čistine zavil desno gori na stazu. Kako san hodil gori san vidil pred sobu da se, potlje grmljavine i pljuska, nebo čisti, malo ma dosti, ću sigurnije prit nazda na vrh. Zavil san livo pa za stotinjak metri prišal h lovcon kadi su me čekali.
Padalo već ni. Božo da je vejicu dil, ma ne tamo nego malo niže. Pogrešil je.
Rile (Ristić Živorad) mi je bil rekal puno kašnje u Rafineriju kadi je delal “tvoj stari je tako vikao na Božu da sam mislio da neće ostati samo na tome.”
Ti put san poćutil koliko se je tata brigal zame, bila je to briga oca za sina. Takov je bil moj
tata.
Božo je Jelić, najbolji prijatelj od tate, dugoletni predsjednik LD „9.maj“ Rijeka. Lovačka hišica u Munsku dragu (Voćar) nosi njegovo ime, a Tomaš je Dane. Ko leto kašnje smo subotu na nedilju pred timi livadami prespali zgora puta i leto je bilo. Puhi su se karali celu noć pa smo spali na skose. Ujutro smo šli „u izviđanje“.
Leta kašnje san bil do vrha Šije z familiju, pokazat lip pogled.
Za saki put kada san se vrnil kamo san til, san računal da san ispit z orijentacije položil. Ma škurava, a posebno magla su hudić. O temu niki drugi put.