Piše na dijalekte Pasjaka: Enica Mićić
Delo san dobila u Kastav u OŠ „Milan Brozović“ vadit une mičkine frkulasiće ut prvega do četrtega razreda. Do ti put san samo jedanput bila u Kastav, na Belu nedeju.
Bilo je leto 1974. deveti misec, a dan nikat lipči. Gren doli z kurjere poli cimitra. Zagledivan se okoli, desno je Zanatlija, muški u plave trliže, livo tišljarija i puno delavci sprida aš je marenda. Zajno priko je štacjon ut kurjer za poć nazat.
Cesta me pelje jako nazgor, z velikin zidon na desno i još većin placon s kostanji. Na samu cestu hiša na hišu i livo i desno, a u hiše zajno s ceste stupiš nutri. Desno pod vrh lip vrtlić z rožicami i spomeniki kastavskin velikanon Vladimiru Nazoru i Ivanu Matetiću Ronjgovu i rivala san na velik plac na Forticu.
Za prit u školu da moran pasat čaz voltu. Ut volte me mičkin brečić kumpanja do pred vrat škole.
Opet je livo i desno hiša na hišu, zazidane, vrtlići z rožicami, škale za nalivo i bližnjica za prit pred školu. Desno na hišu je pljoča prve čitalnice. Gren naprid i pazin kako hodin aš su na pod velike pljoče, kot zglancane.
Se mi to dava znat da su ti ljudi vridni, šparni, škrbni, aš prvo leh su zidali su pregruntali kako ćeju škrbnije pasat.
Aj kako je velika šterna, una kadi su jenega hudega kapitana si utopili u lokvu.
Na prvi kat potrkan na vrata kadi piše tajništvo. Dobar dan, ja san Enica Mićić, ča ste vi drug direhtor?
Ne, ne, ja san Vojmir Jelušić, nekadajni, neš njin pomoren, a Stanko je ovde, va kamare.
Čul je, utprl vrata i rekal: minja hot, hot nutar.
Visok čovik, pravi mužakar, jima ki sivi las, nosi ućale. Ponudil mi je sest i smo počeli naš pogovor za delo u produženi boravak.
Počela san delat u ti lipi grad. Direhtor je bil delavan, z malenkostju zadovoljan,škrban, morda i preškrt sam zase, aš se je hiša delala.
Uvo ča ću povidat ni ut dela u školu, ali morda je, ne znan.
Jedan dan smo, potlje južine, kolegica i ja jiskale par školani šestega razreda. Ni jih nigderi bilo, kat najedanput na vrata jih pelje učiteljica Bosiljka Brkić i nan govori: pogledajte ča nose va školu, dajte to direhtoru i neka ih kazni. Našla jih je poli soje njive valje u Beliće. Zele smo usku čudnu knjižicu, a dicu poslale u razred.
Gledamo i vrtimo, a nutri slike, ma celi filmić kako se une stvari delaju.
Bilo nan je jako zanimljivo aš tako ča nismo nikad vidile. Morale smo to prijavit direhtoru, radi Bosiljke.
Za sriću dicu ni štrafal, a ut knjižice ni već bilo ćuha ni buha.
Jedan dan se je Stanko bil niča razbolil, neku poštu je držal u škabelin pod ključ pa su morali razbit bravicu, a nutri je bila pošta ma i ta, bimo danas rekli, porno knjižica.
Ja, i direhtor je bila radovedan.
Značenje riječi: hiša – kuća, zgrada, potrkan – pokucam, mužakar – muškarčina,
južina – objed, brečić – psić, štrafal – kaznio.