Evo jesen je već prišla i nekada je u temu vrimenu gora bila puna ljudi, ki su pripravljali stelju za blago ali ča drugega. Dica smo jin pomogli, a ako ne drugo smo bili vavik z našimi nonami i nonoti, kamo got da su šli. Spomine, ki smo jih onda storili, se ne daju kupit ni pozabit. U pjesmici Boršt je prikažen jedan takov delovni dan, rekal nan je Nenad Smajila. Danas ni već u šumi ni ljudi, ni dice, tako da si takove spomine nećeju moć već storit.
Bôršt
Kȁda sȃn po škôli dôma pritȇkal z nȃpravljenin vôzon mȅ je nôno vȇć čȅkal.
Na lôjtrnice je zlôžil kôše za u gôru, jîh preplȇl z upȑtu i vȇzal za sivôru.
Pôtlje je žȃkalj napȗnil zȃs sȇnon i stȃvil ga na zȁdnju prȇmu,
dâ sân na njȇmu lȁhko sedȉl i vôzeć se, nîs žȗlje dȍbil.
Vôz na šîne, po kȁmniti pȕti je skakȁl po sõje i bîl vȁvik nagnȉt,
vôzit se tâko je bîlo nespȁmetno, ȁš me je mȍgla i kakôva grãja zagrȃbit.
Uprȇgnjen vôz z vôlon i z krȁvu, nôno je gnȃl pomȃlo za sȍbu.
Sîvac i Sîvka su skȕp hodȉli, mȁ sȁko tolȉko su po sõje zavîli.
Nôna je vȁvik udzȃda hodȉla i glȇdala kȃmo ti vôz peljȁ,
pa je nônotu kî pȗt zakričȁla: »pȃzi na krȁvu, kȉ vũče ćȁ!«
Slabȕ ȕru smô tȃko hodȉli, pôli želȅznice, kazȇrme i bodljȃtega drȁta,
dȍklje nîsmo prîšli u Bôršt i particȇli utpȑli vrȁta.
U pȃrat je nôno blȃgo prevȇzal i sȁko govȇdo za sõje drvô zavȇzal.
Pomulȁl je upȑtu, ôkoli lȁhta je zvîl i kôše z vôza nȃtla položȉl.
Dôklje je nôna grȁbila vȇje, poslȁl me je ôkoli preglȇdat cȇre i rȇkal:
»Dȍbro poglȇj na sȁko drvô, pa ćȅš môrda ničȁ i nȃć«.
Tâko je i bîlo.
Četȑti cȇr pôli pûti, u drûgi vȑsti lîvo je jîmil utpȑtu škôru.
Nȃ kvȃrat višîne je ž njȇ štrlȉla čûdna špȉca,
prîšal sȃn blȉže i vȉdil, dȃ je to ud bajûneta rȕčica.
»Našal sȃn, nȃšal«, bîl sȃn vȅsel i rȇkal nônotu da bîn je zȇl.
»Dûgo je bîla tôte, pa nȅka ti bû, zȁmi je dôma, bőlje za njû«,
je rêkal nôno i prȃvo jimîl, ȁš bajûneta je sȁda mőj spomȉn,
kêga sȃn u Bôrštu na nônota i nônu stôril.
Nenad Smajila, mag. arheol.
Besede: lôjtrnice-stranice voza poput ljestava; upȑta-široki trak; sivôra – uzdužna veza
prednjeg i zadnjeg dijela voza; kazȇrma-vojarna; bodljȃti drȁt – bodeća žica; particȇla-zemljišni posjed; pȃrat-šumski posjed; utpȑto-otvoreno; kvȃrat – četvrtina; tôte-tu
Prepušćan van odluku ali ćete objavit i sliku ali ne.