Piše: J.O.Hrvatin
Češpe ne rodiju sako leto jenako, ali koliko bimo tili, ma pred par let su malo dale mislit. Okoli sela jih ni bilo, a u selo, u vrte je, a to je bilo se skup malo pa su za marmeladu dobro prišle ličke. U Brusan su zapušćene i se šušiju, a bilo jih
je se med puton i patokon, čez celo polje.
Črkice z starine su zvučene z knjige Zbornik Liburnijskog krasa, sv. 4, Naši ljudi i navade, 2022: Pop Aleš Peter, župnik i dekan u Jelšanah med 1830. i 1838.leton, ni til ženit ninega ki ni cipil ali posadil najmanje dvi mladice žira (voća). Tako se je bilo posadilo fanj črišanj, jabuk, češp i urihi.
Kada se je za Vazam porabilo jajca, škore ud jajc se je zmastilo i zaneslo u ograd i pomećalo natla okoli žira, češp, hrušav, jabuk, sliv, ali črišanj, ač da su žegnana pa da će bit dobar žir. Danas se meće ća škorice ud jajc, a zna se korist za pognojit okoli stabal žira. Ča ja znan se jih mećalo kokošan, jimaju kalcija, ma ne ća.
Lajkotovi zas Šapljan da su na Križne cere jimili po dvisto stabli (stabal) češp. To je rebra zgora štrike proti ješeuskemu kunfinu (Jelšane). Naložili su jih u gnojni koš i z vozon jih vozili po putu Pod most, zdola štrike, pa čaz polje Brusan doma u Šapljane. Bilo je to 1963. leta. Užali su nabrat toliko puno češp da je prišlo po šesto litar rakije, da je cela hiša dišala po rakiji. Pobirali da su jih do 1970. leta.
Češpe su otpeljali prodat u Ješane z vozon i voli, ali kravami, po putu proti Ciburici. Tamo je na otkupnu stanicu delal Milan Šimenov zas Pasjaka (Surina).
Uvo je napišeno doklje je Ona pripravljala češpe za skuhat marmeladu pa sve do finitka. Deset kil brez grižic (koštica) je polila z decon jabučnega jesika, pokrila z tavijolon i pustila do jutri. Drugi dan popodne je ulila dec ruma i posula na drobno narežene škorice ud dva limona pa dila kuhat. Doklje smo jimili plin je zgora dvih “ploč” dila tanak železni pleh pa je on prenašal teplinu plina na padelu. Kašnje, na moderniji šporget, je padelu dila na letričnu ploču. Da bi pomalo grilo je kolo ubrnila na pol (umjerena vatra). Padela je široka 40, a dimboka 13 cm. Kuhanje je duralo četire ure i kvarat, rabilo je sako malo mišat. Čiste staklene važiće se mora sagrit u letričnu peć na sto stupnji jeno kvarat ure.
Pozatin se dene još gorku kuhanu marmeladu u gorke važiće, zapre pakrove i složi u pećnicu pa pusti de se uhladi. Prišlo je pet većih, četiri srednji i četiri manji važići, se skup okoli sedan-osan kil marmelade. Marmelada nima kapa cukra ni sladila. Češpe su bile z Dolinj. Hvala dobri Dolinjkici Dolores za fine zrele češpe. Ud takovih češp je prišla jako dobra marmelada, ali kako biju drugi rekli, pravi pekmez od šljiva.