Piše: Darinka Martinčić
Si navila žvejarin, pital bi tata mamu prvo nego su spat šli. Starinski žvejarin z dvemi zvonci ronpotal je sako jutro na komodine. Ala, stat se j’ aš krava tuli. Hodi ti Ive skidat, a ja ću dokle snetit i kafe zavret, rekla bi mama, pa ću onda
pomust poć. Z vejnice se j’ zimalo veje za steju i za snećevat. Za snećevat je vavek pod strehun bilo parićano suhega prašća, a v’ lete se j’ i netilo samo s prašćen.
Kravu j’ vavek muzla mama. Friško pomuženo jutarnjo mleko zmešala je z onen kuhanen od sinoć, nalela va late, složila va koš i nesla prodat. A imevali smo mi i kozu. Kozje mleko rabilo j’ samo za nas i za prasca. Ako san otela palačinke, bilo je – hodi kozu pomust pa jih delaj. Samo kadagod ako j’ falilo mleka za na mesta, mama j ‘ užala malo namešat, ma jako malo da ne bi bilo poznat. Kozu smo sako leto pejali nabrejit. Pejala san ju ja tako jedanput prču Vedež. Zgoru j’ šla veselo, gore j’ dobila po ča j’ šla i nikako nazad. Najzad san ju na pol puta vezala za jesen i šla doma prez kozi pa neka re po nju ki god će.
Kuhalo se j’ na špargete na drva aš drugačijega ni ni bilo. Za kafe kuhat imeli smo suricu z repon su črnu od zdola. I padele su bile črne od zdola aš se j’ znimalo kolonbari da brže zavre. A i broštulin za kafe je pak bil vas črn aš je šal
cel va šparget. Mleli smo va kvadraten starinsken malince i to vavek sprotu koliko j’ rabilo za jeno kafe. Pol kafa, pol difki, sejeno će bit dobro! Fundaće ne ća hitit aš ćemo jih prekuhat za južinu. A kafe j’ zasprave bilo dobro z mlekon od
sinoć ko j’ preko noći storilo debel škorup. Kikarica belega kafa s škorupon i nadrobjen kruhon i južina j’ odbavna.
Za kuću se j’ držala kokošarnica. Kokoše se j’ jutro otprlo i pustilo van, a k večeru su se same prišle spat. Imeli smo vavek i peteha, pa bi mama o mlade lete nasadila kvočku na jaja i vaje vaje zlegli su se pipići. A ča su kokoše pušćale
za sobun okol kući i sakuda kude su hodile za ten se ni šlo. Tr tako j’ pul sake kući.
Ma ča san tako stara da se domišjan nečesa ča mi se čini kako da j’ bilo pred dvesto let, a ni.
*Z knjigi Darinke Leprinčić “Pametiš ti, Ive…”