Božić nan gre, i ženske ke znan već pomalo peču keksići za va škatulu ku će spravit do Božića. Ako ju ki prvo ne najde… Ako ši, će morat još ki pleh dopunit. Orehnjača se još ne peče, lego tamo pred Božić, ma san našla ovaj recept ki me spameti na djetinjstvo, kad je teta Mira pekla najboje orehnjače va familije. Onputa je i sen podelila ovisti recept:
Testo:
3 jaja
1/2 kg muki (brašna)
3 dkg kvasa
12 dkg putra al masti
korice od lemuncina, kanele, ruma
malo soli
1 žlicu cukara
Od sega zamesit testo: Prvo 3 žutnjaka zmešat z žlicun cukara i putron. Od 15 dek muki, 3 deka kvasa, malo cukara i mleka zamešat posebe da se kvas zdigne. Va drugu zdelu dodat 35 dek muki i sol. Kad se kvas zdigne, doda se va zdelu. Primeša se sneg od 3 belnjaki. Zamesit srednje trdo testo, dodat mjašnega mleka koliko rabi. Pokrit i pustit da se zdiže.
Nadjev:
8 dkg putra al masti
10 dkg mrvic od kruha
1/4 kg mleveneh orehi
3-4 dcl mleka
25 dkg cukara
Putar rastopit, na njin popržit 10 dek mrvic od kruha. Posebe zgrijat 3-4 deci mleka i kad je vruće prelet preko orehi. Se skupa zmešat. Dodat cukar. More se dodat cveb, cikulade, korice od naranče i lemuncina. Ako j’ pretrdo, dodat mleka. Namesto orehi, se more stavit rogač kako na slike, ma va rogač se još more jena jabuka zribat da ne bude presuho.
Kad se j’ testo zdiglo na duplo, se razvalja, stavi nadjev, zarola i speče.
