Piše: Nikolina Morićeva
Ma san se razjadil. Su me znemeli ti moji stari, si odreda!
Nan govore neka se ponašamo, da za stareji imamo rigvarda – i još nan reču da nismo za niš, da samo gjedamo kad ćemo pre zbeć – a kad njin rabi neš z mobitelon, ne moru movit bez nas mlajeh…
Bedasta dečina? Morda, ma je moralo bit davno.
Neki dan san opet imel kažin z nonun. A bilo je tega više puti, saki put kad joj rabi pomoć okol čega z tehnikun. Neću van povedat ča je se bilo kad san joj moral pokazat kako će namestit navigaciju va aute, aš da će durat uru vremena. Samo ću reć – sedeli smo va noven mićen rabjenen fićeke više od ure. Ona sa sretna ča ga je dobila, črjeni kakov je otela, svetli znutri, se ča j’ želela. Ma j’ otela poć na put sestre, i govori mi da joj pokažen kako delat z tun čudesnun navigacijun, i z telefonon, i se ča se more z tun škatulun, z tun televizijun va aute… A da kako j’ nekad bilo lahko, ni bilo seh teh čud, sedeš va auto, mora imet benzina, ulja, vodi, i voziš. Prvo gjedaš na hartu, a potla na znaki. I greš.
A sad?
Ala, gremo prvo ztipkat tetinu adresu. Ajoooj, ni to tako lahko…Da gre zet kus papira i kemisku da zapiše kako ča po rede gre. A rabe njoj i drugi oćali … Pa opet i nikad finit, kad nona prova sama, samo se zgubi i išće svoju hartu… Ča ću van reć, na kraje ona govori da već ne more, a ja san već bil sav zmućen, ma nisan niš rekal. A kad san pogjedal na uru, slabo mi j’ prišlo.
Bilo je još tega, sačega.
Neš smo povedali oko stareh slik, a ja govorin – e, to je danas se na Instagrame, pa moru i oni ki nisu tu z tobun skupa gjedat tvoje sliki, to je kot album za seh…
Da Insta- ča??? Instant kafe, to znamo, ma da insta- gram? I to album? Ča ni to ča za poć speć kakov kolač, da je brže gotov???
Ča ću van reć, se ča je nova tehnika je tragikomedija. Ne znan bi se smel ni plakal od muki kad niš ne razumeju…
Ki me vrag gonil spomenut TikTok? Ne znan… ma mi je zletelo, a nona govori – ki gre? Ki prihaja? Ma niki, nona, ni to na vrateh…
TikTok ti je na mobiju, ljudi stave smešneh filmići, to ti j’ neš kot humor i vicevi s televizije, ma kratko, i judi sami store i stave. Ti je za nasmet se, da ti bude lepši dan.
Pa san neš pokazal – ma je se ni dojmilo. “Zač bin to iskala po mobitele, ni ne vidin dobro ča je? Iman i bez tega ča za delat…”
A tek Spotify? Moreš slušat muziku ku voliš, kade god si, kad god ti se spameti, se ti j’ na mobitelu!
-Ma kega će mi vraga to? Tr ne nosin mobitel stalno sobun, a kad bin poslušala muziku, vavek moren opret radio!
I daje… Taj George od banki. Govori mi – ma ja ne znan nijenega Žorža, nego oni jedan ki je nekad imel butigu dole v Reke. Otkuda pak taj Žorž sada, ča on ima z mojun bankun, ča on ima iskat va mojen mobitele???
Claudea boje da ne spominjen, aš kako ću objasnit da je to umjetna inteligencija…
Sad znan zač judi reču da su posiveli prerano.
Boh i se!