Piše: Nikolina Morićeva
Kafićo… biš morda jeno kafićo? Ma znan, već je kasno, pet pasaneh, da ča nego znan.
-Nego ča nego ću, kemu je još jeno kafićo škodilo?
– Ma ti je to već peto danas, ča ti neće bit slabo?
– Ma si pošempjala, a zač bi? Naše domaćo, kastafsko, fundaći prekuhane tri puti, a morda i više – ki zna, ma kega briga, ča ne?
Gremo sest skupa i poćakulat: ča j’ danas sega bilo, ča smo kade čuli, je ča novega ni ne?
Jeno kafićo za dušu steplit.
Kot onda kad smo mići za večeru od none dobili nadrobjeno kafe. Ma ča smo bili ponosni, još ni va školu nismo šli, a mogli smo kafe dobit!
Ma nona nan je pozabila reć da je kafe Divka….
A neki naši stari su i tu našu staru užancu zeli sobun va Meriku, davno, kad su pasali preko mora pobeć od mizerije, iskat bokunić sreći, dela, tamo negdere va stranjskoj strane.
Već je više od dvajset let pasalo kad smo jenega tega, onda već nonića, šli obać. Je bilo puno za povedat, za spamećevat se, smet…. Smo šli skupa na obed, i tu nas je nonić pustil bez glasa, z oprteh usteh. Z obedon ni otel ni vodu, ni žmuj vina popit.
Z obedon je pil – kafe.