Naša draga suradnica Marija Gračaković ovisti tekst nan je poslala još pred dva meseca, ma komać sad gre va Škabelin. Vrag zel i fugu!
Piše: Marija Gračaković
Dragi moji, svi vi kin se pijažaju ove štorije!
Danaska ćete mi opet morat dozvolit malo „nostalgije“ za pasanin vrimenon, aš ja kako da bez toga ne umin ni pisat. Ma kad ganamo od zabljenih besed ontrat i to vrime nikako pride – normalno.
Bilo je to vrime kada smo jimili, da bi se preživit, dicu najist i školovat moglo, jako čudo teškoga dela, ma istešo i čudo vrimena za rodbinu, prijateli, za feštu delat, poćakolat zo susedi o svemu ča se, magari, u naše mesto dogaja. Za sve se je našlo i jimilo vrimena.
Naša je kuća na put, pa bi se žene zo brimenon na glavu fermivale, ja bin njin prnesla žmulj vode za popit, a one bi se zo mater poćakolale. I nisu fugale, sve ako njin je brime na glavu bilo teško. Ganale su da će sve orivat opravit. Tar neće vrime uć! A ćakolalo se je od življenja, ča se kuha za obed, a „obrnule“ bi se i novitadi u selo. I na kraj bi rekle: „Vero smo se lipo poćakolale i intendile. Vrag zel i fugu. Dela će bit, a nas neće.“
U te šerije štorije od sagdanjega življenja bi se i čagod šaljivo, kako u mrižu od pauka, zaplelo. Tako je bil poznat i više puti spominjani „vic“ da je ovo „Vrag zel i fugu!“ rekal jedan puž, nakon ča se je dvi ure prtil na jedan malo veći kamik, pa doli pal.
Beseda fuga (lat. žurba, bijeg, trk, brzina) hranja vase više značenj: u glazbu, u zidariju…, a mi ju rabimo jušto u ovo značenje – žurba.
Reče se da vrime leti, da nan kako melo kroz prsti pasuje, a ti su prsti tribida jako rašireni, pa se sve prebrzo dogaja. I saka smrt prebrzo pride, pa kako nan na kraj neće bit žal ča nikad nismo jimili lazno za onih kih volimo, a ni za ono ča volimo.
Nigda smo pisali dugi listi, jimili vrimena da dobro razmislimo prvo leh ča jih pošaljemo, dva puta bimo obrnuli saku besedicu, pazili na lipi rukopis, da indiric bude lipo zo vele slova napišen, da pero bude „oštro“ i sve kako rabi. Da ga on ki prijeme veselo i kuntento pročita i spravi u škatulu za listi. I misliš: koliko će putovat, je ga ta draga osoba prijela, je njoj bilo drago?
Pa čekaš „brzi odgovor“. I unaprid mu se veseliš. Jimaš lazno za čekat, ma istešo biš volil da ča prvo pride. Tako se i dogodi, odgovor pride, srićan si i već misliš na novi i lipi list ča ćeš poslat. Jimaš i letrati: prvo ovoletnje kupanje. Ava lipote.
A danaska!? Ma kakovi listi? Nimamo lazno ni za poruke na ovi novi „izumi“. One su manko kratke!
I zato: kuntrajmo se ovomu „niman lazno“. Homo počet živit kako Bog zapovida. Najdimo vrimena. Ono nan rabi.
Homo zet vrime!
Koristit ga.
Za dušu.
Za lipi listi pisat.
Za trefit ljudi kih volimo.
Za ljubav.
I sve pomalo, ne fugat. Vrag zel i fugu!
Petrovski misec 2023.
fuga – žurba; pijažat – sviđati (se); fugat – žuriti; umit – znati; poćakolat – popričati; intendit – razumjeti; brime – teret; orivat – stići; kuntenat – zadovoljan; melo – pijesak; jiman (niman) lazno – imam (nemam) vremena; pomalo – polako; list – pismo; homo – idemo; kuntrat se – suprotstaviti se; pomalo – lagano, bez