Piše: J.O.Hrvatin
U sabotu, prvo Ulične nedilje (Cvjetnice), u Brce u crikvu Svetega Duha se je žegnalo uliku. Fagote zas šibami ulike su donesle za prodat Kastavke, kako su njin rekli, ma bile su morda Lovranke, ali Bodulke. Dobile su pešćicu fažola za šibu i kakovo jajce. Ko je bila veća šiba je bila već draga, a ki si je kupil se je gledalo da je bolji gospodar. Pera ud ulike se je pomišalo zas senon i dodalo malo soli pa je blago pojilo žegnanu (blagoslovljenu) uliku.
Zas tu žegnanu šibu se je potlje zagnalo blago na pašu. Ni se je smilo zgubit, aš da bi se blago gubilo celo leto. Potlje paše se je šibu zataknilo u štalu.
U Lipu su par dan prvo Ulične nedilje kitice ulike donesle ženske z Bregi i Rukavca. Milojki Božić je mama povidivala da je z Rukavca prihajala nika Francika z uliku i da je za to dobila šalicu fažola ali simena od kapuza.
„U Pasjak poli Vrtoličinih na Vazmeni četrtak na devet ur ujutro je moja mama šla u kambru i zlila vodu zas sklede priko okna natla. Prvo nego poć gori mi je rekla da stojin pod oknon da me ta voda malo polije. Voda je bila žegnana, a zlilo se je je za blagoslov zdravlja ljudi, blaga i litine (jintrade)“, povidala je Elza Cerin, už.Smajila, roj. 1936.
Za vrime ud Ulične nedilje do Vazma se je reklo Veliki ćedan.
Na Veliki četrtak, četrtak prvo Vazma, zazgoni zgon crikve. Do Vazma crkveni zgoni zamučiju. Namesto zgonit, za poć u crikvu, nikadà se je seljane zvalo zas škrbutavku. Mežnar je namesto zgonit škrbutal po selu i stin ljudon naznanil podne, ali da rabi poć u crikvu.
„Mi smo kot dica zaz škrbutavkami namesto zgona ubznanjali se uno ča su tribala zgona. U četrtak pod noć su zgona utihnila i nisu zgonila do nedilje u jutro za prvu mašu. Mi smo svi jimili mičkine ali kad smo prišli u Ješane pred crikvu su bile jene velike, ma kako karijola, pa kad je mežnar zavrtil se je čulo ja mislin i do Ciburice“, povidala je Adrijana Dragičević, Kundina, roj.1939. Navada je bila skupna za se kraje.
Žëgnani vôganj su u Brce uvako dobili: fanti Pepić Kovačov, Brce, ki je bil mežnar, i žnjin Jože Kršanov, su užali nosit gubu z Brc u Ješane rano ujutro, na Veliku sabotu, dan prvo Vazma. To je bilo okoli leta 1958. Šli su po putu zdola sela h štriki, pa u Brusan i Pod most (pod železnički podvožnjak) poli Rulje Lajkotove (Šapljane) dalje po putu čaz goru ku Dolenjci zovu Šušanj. Z vršića se vidiju Ješane. Po stazi su prišli van poli njiv i ješevskega cimitra.
Pred crikvu je bil uganj. Gubu su dili h ognju, puhali sako malo da uganj ubastane i po isti puti prišli nazad u Brce. To je bil žëgnani vôganj (blagoslovljena vatra) kako su mu rekli. Nesli su ga u saku hišu i udlomili kuščić gube s ku su Brijci znitili uganj. Za tu gubu su dobili jajce.
Žegnani uganj su palili i Starojci pred crikvu Svetega Jožefa na Veliku sabotu. U crikvu je bila maša i žegnanje (blagoslov) pogač i jajc, a vani se je zelo u jenu laticu žrjavke i zaneslo doma. Kus žrjavke se je vrglo u uganj, a ugljen čuvalo za naprit proti uroki kada je grmilo i bliskalo, kada se je pr’pravljalo nevrime.
Na Vazmenu sabotu se je misilo sladak kruh (pogaču) i šišore. Šišor je pletenica, more bit veća, ali za dicu manja, zas friškin kokošjin jajcon na jedan kraj. Jajca se je skuhalo u vodu zas čebulu pa su tako bila pofrbana.
Šišor je zgledal kako jedan pofašan utrok, glava mu je to jajce. Okaca na jajce za šišor se je storilo tako da se je sažgalo ječmik i tako sažganega dilo na jajce. Peklo se je do zapodne, a potlje se je u košaricu dilo sladak kruh, šišore, kus prašćega pleća i mlad luk. Doma se je pokrilo z tavijolon i u košić neslo žegnat u crikvu.
Starojci šišoru reču kitica.
Bila je navada da se hitî doma z tu žëgnanu vazmenu hranu. Se zna da ženske ke držiju do tih starih navad dandanas ahtaju za prit prve doma.
Na Vazam na osan ur ujutro se je šlo na mašu. Vazmene maše su bile namenjene samo vazmenin navadan, ni se delalo mašu za mrtve, nikad. Prvo Vazma se ni ni ženilo aš je bila korizma. Za kega pitat ko je bil u crikvu se je reklo: si bil poli maše?
Kada se je pojilo jajca, škore ud jajc se je zmastilo i zaneslo u ograd i pomećalo natla okoli žira, češp, hrušav, jabuk, sliv, ali črišanj, ač da su žegnana pa da će bit dobar žir.
Pičenje jajc: Na dan Vazma se je pred Dolinkinu hišu u Pasjak doneslo kuhana žegnana (blagoslovljena) jajca i čentežim (sitan metalni novčić) i pičilo jajca. Prvo nego poć se je reklo ćemo, ali gremo (homo) píčit jajca. To je bilo tako: dica i fanti su dili saki donešeno jajce natla pred zid. Jedan za drugin su mećali ti čentežim u jajce. Čigov čentežim se je zapičil u jajce, je dobil.
Navada je ubastala još za vrime Talije, potlje ne.
Za nedilju po za Vazmon se je reklo da je Mali Vazam. Tako je i danas.
Još su povidali: Josip Sanković, Jože Kršanov z Brc roj. 1950. Milojka Božić z Lipe roj.1947; Milan Surina, Kundin, roj. 1933. Pasjak.
Žuca obavezna Vazmena jidača
U sabotu prvo Vazma se je delalo i žucu. Kuhalo se je u velik lonac ud pet, ali već litar, po temu koliko će bit pijati, ali ljudi ki ćeju jist.
U lonac ud pet litar se je dilo četire prašće noge, ušesa i trubac, par rižnji česna, soli po ukusu i par zrn papra, a vode do vrha lonca. Rep se ni divalo, je bil pojit prvo, za pust, kuhan z ripu.
Meso ni smilo jimit prašćih dlak, pa se jih je zapalilo, ali ća postrgalo. Za tin se je so meso upralo pa pustilo da se moči dan i pol najmanje, pa po dva, ali tri dni.
Ko je veći lonac mora bit vode 5-6 litar. Rabi dodat par perc javorike ku se je prekuralo z Upatije aš ovde je ni bilo a danas je. Kuhalo se je, tako, ud osme ure ujutro do četire zapodne, najmanje osan ur. Za une ki su raje jili manje masno se je znelo mast po vrhu lonca, se je pobralo ća.
Žuca je skuhana kada meso pride mehko, kada je svo raskuhano, da se lahko odvaja ud kosti. S tega lonca je prišlo žuce za sedan pijati, unih starinskih, dimbokih. U saki pijat se je dilo mesa da je posud jednako. Žucu se je neslo hladit u mrzlu kambru, ali na okna, da se strdi. Kambre se nisu grile pa je u saku bilo mrzlo.
Jeni su u pijat u žucu dili kuščiće zrezanih kuhanih jajc.
Žucu se je šerviralo na Vazam za južinu. Ni se jilo samo to, nego i pečenega jarića, kuhano pleće, luk i obavezno sladak kruh kemu se je još reklo pogača.
Za povidat je i to da su luk nosile Marija Krašovka (prezimena Cah) valje zas slovenskega Krasa prvo Kopra, otuda njoj nadimak, z vozićon i tovarićon, a potlje nje Kastavke pa se je ud njih kupivalo. Danas se luk posadi u soj vrt.
Žuca se ni delala samo za Vazam, ma za ti dan je bila obavezna Vazmena jidača.
Žucu se je storilo i ekstra ki je je til jist pa se je dilo po dvi suhe prašće noge, kus prašćega trupca i jeno ušeso pa je bilo za Vazam i potlje.
———————————————————————————————————————————————————
Povidale Irma i Elza Vrtoličine, Pasjak.
Izvor: Naši ljudi i navade, 2022. Nakladnik Udruga za očuvanje čakavskog govora „Beseda“ Rijeka.
Besede: Kambra je soba, skleda je zdjela, pa je i beseda sklednjak za viseću zidnu policu, a žuca je hladetina.
Guba je kresiva gljiva, pobrali smo je z drva kadi je rasla (bukva, cer). Kada se je zapali ne gori nego „klije“, pomalo dimi i čebelaron je i danas dobra za malo podimit čebele pa jih to umiri prvo nego znimat okvire van košnice. Guba je posebno ljekovita, a jme njoj je još i trud.
Hartulina je prišla z Cremone (fam. Sozzi) 15.4.1957. u Pasjak.
Na dno je retka slika Paščank z dicu i moj nono Jive Kućankin, slikani na Vazam 1952.leta. Nis doznal ki je slikal. Na jenu sliku ud 6.12. 1952.leta (Sv.Miklauž) piše da je prišal jedan slikar z bicikletu z Lovrana i slikal. Vesel san jimit ča takovega pa znat kako su fotografi znali kada prit za mali zaslužak ma moje zadovoljstvo je puno veće.
Hvala sin ki su mi znali povidat ki je na sliku da san mogal zapisat jimena. Ki pita ne zahaja.