Piše: Darinka Martinčić
Prvu televiziju, našega „Čajavca“, moji stareji kupili su oktobra meseca šezdeset i nekega leta. Bile su to leta va keh je Opatija, gledajuć produžit sezonu, živela pod parolun „Oktobar u Opatiji“, a glavno dogajanje bil je Opatijski festival.
Bit će festival na televizije, ćemo ju kupit?! Toliko san se veselila ten festivalon. Prihajali su v Opatiju si pjevači keh san volela i poznala z radija, a cela Opatija zgledala je kako jena vela muzička bajka. Izlogi urejeni na temu festivala, panoi z slikami pjevači na saken korake. Tekli smo z školi z Gorova kroz park do Kvarnera ćapat čigov potpis al baren samo videt kega slavnega da imamo ča povedat. Robić potpišuje i deli slike na terase, vau vidi natapiranu Gabicu na Lide pred filigranon…
Nosila j brhan od brokata zašiven na bačvicu… Kako su žive se te uspomene.
Sanremo san prvi put gledala na društvenoj televizije va ondašnjoj našoj mjesnoj zajednice. Bilo j to leto kad je Điljola kantala „Non ho l’eta“. Pul sused ki su imeli televiziju prvo nego mi, gledala san prvi put opatijski festival. Pobijedil je Vice Vukov – ki glas, a zgodan…!
Najzad su i moji doma, boje reć mama aš njija je vavek bila zadnja, odlučili kupit televiziju. Prišlo j tako to čudo i va našu kuću. Televizija j ponosno stala na napošnen stolčiće storenen samo za nju. Na police pod televizijun stal je radijo, a pod radijon na malo manjoj police stabilizator. Nad ekranon je vavek bilo mesta za čentrin od merlića i još kakovu pršku zgora.
Najvažneje j bilo znat namontirat i dobro najuštat antenu. Pul tega dela, rabili su najmanje dva od njih. Jedan na krove pul palini na ku se j nabanderala antena, drugi pred televizijun. Ta drugi je kroz otprtu poneštru zijal kakova j slika. Obrni još malo! Ne toliko! Provaj na drugu stran! Pusti tako, tako,tako, tako! Dobro je! Još vavek je zgora talara od poneštri zvrtana škuja kroz ku j pasevala žica od anteni.
Dogodilo se j čuda puti da sneg zaspe ekran jušto kad ne rabi, a za ten bi leh pisalo – tehničke smetnje. Televizije su bile na lampe pa j morda ki put bil i slab kontakt. Otac je užal reć – daj njoj ćepu! I bome, kadagod je poslušala i prodelala.
Daljinski ni postojal aš ni rabil. Imeli smo samo jedan program JRT – RTV Zagreb. Ako su televizije i bile storene za više kanali, spočetka j delal samo jedan. Kadagod se j, ako j bilo lepo vreme i dobar signal, moglo ćapat Taliju. Rabilo j zato vrtet antenu al kupit još jenu.
Za sen ten jako smo voleli tu našu televiziju i z gušton čekali ča ćemo gledat.
Prvo česa se spametin je „Gradić Peyton.“ Kad bi nedeju o polnu počela serija, rinula bi mama padelu na rub od špargeta – neka gulaš počeka! Se bi pustila pa bi sela i gledala ča njoj ni bilo nikako spodobno. Po pundejkeh je užala bit tv-drama, a sredu „TV magazin“ va režije čudesnega Antona Martija.
Saki večer prvo dnevnika šal je program za decu – oni dobri stari Diznijevi crtići, Slavica i mendo al pak brižan Kalimero ki j vavek plakal: „To je nepravda, prava nepravda…“.
Za Dnevnikon smo po nedejah komać čekali „Veselo veče“ i humorističke serije – „Samoupravljač nije otirač.“ Se ča se ni smelo na glas reć, rekli su oni kroz pjesmu, šalu i kumediju. Ni više samoupravljači, ostale su samo uspomene na Miju Aleksića i Čkalju, Burduša, Maricu Hrdalo… Nastali su kašnjeje z novemi serijami Dudek i Regica, Šurda, Presvetli… A kad je krenulo „Naše malo misto“ va urah od serije, na cestah ni bilo živega stvora.
Mej zadnjen ča smo gledali na toj našoj črno-beloj televizije bil je Titotov sprogod. I opet su susedi prvo nas imeli ov put televiziju va boje pa se j tako suseda bila prišla pohvalit: „Ajoj, škoda da nimate boju televiziju. Da ste videli one krune, a se one rožice, ka lepota, keh kolori!“ Nisan razumela je ona tugovala al uživala.
Ne pametin kada smo kupili televiziju va boje ni ke marki. Za razliku od one prve črnobele, niš više ni bilo toliko vredno ni veliko. Vaje za televizijami prišal je videorekorder, posujevale su se i kupovale video kazete, a kad se j pojavila sorta moderneh televizij ke su imele mesto za CeDei i USBei, i video kazete i videorekorderi finili va staru kramu. Danas se po kuće mota sakakoveh umotvorin – većeh i manjeh ekrani na keh se more nać stotine kanali i programi. Mobiteli, tableti, laptopi… Televizija mora bit ča veća i ča tanja da se more obesit na zid kako slika, a ni već dosta imet va kuće ni samo jenu televiziju.