Piše: Darinka Martinčić
Ki gušti odpravit se, trefit kumpaniju i poć Tumpićen na tanci, hodeć i preskačuć škuje po beloj ceste. Za obuću prišparat od domi smo šle smo va opankeh, probule se pul Spomenika, a opanki zarivale va štrped. „Ala divojke, ne
štentajte aš van se škoda dela“, užale smo čut.
Tanci va Dome va Leprince bili su vavek nedejni dan i to od pozimka do mlada leta. O Petrove’j bil tanac Pojanah i Rukavce, a po lete Bregeh na tarace „Pul Miloša.“ Leprince j’ sopnjada durala večer od osme pa do pol noći najkašnjeje.
Prve leta, va sale nisu bili stoli ni katride, samo škanji pul zida. Na jenu stran sedele su al stale divojke, a na drugu mladići. Čin su se sopci počeli parićevat za sost, krenule su oćade i tiha nada da će morda „baš on“ prit pome. Samo da ne bi šal tancat z onistun…, samo da šervit ne ostanen. Divojka ka ni otela poć tancat z onen ki ju’j prvi pital, tisti tanac ni smela tancat z nijenen, aš ako bi šla, mogla j’ od odbijenega lahko i ćepu ćapat. Kad su sopci najavili – „dame biraju“ otkrile su se čuda puti skrivene simpatije. Ako bi pak divojka storila dva tri tanci za redon z isten mladićon, zajeno su jih proglasili da su frajari.
Jeno vreme bila j’ užanca da stareje ženske, none, tete, susede… pridu, tobože gledat tanac, a zasprave, prišle su oči napast i zajik nakjepat. Zele bi sobun za škužu kega od dece pa san tako čula povedat da je neka pitala susedu – biš mi večeras posudila tvojga otročinu, bin šla malo va tanac gledat našu maletinu. Pomalo je pasevala i ta moda, pa su još neko vreme kurijože babe prihajale samo špijat kroz prušijane.
Mojeh šezdeseteh let, neki se j’ bil domislel zakolat kartu po poneštrah. Va salu su prišli stoli i katride, a pul stoli mešane kumpanije mladetine. Od starejeh, osim o puste, nigde nijenega. Na pozornice „Veseli jazz Čavela“, a va mode minice, natapirane frizure, najlon stomanje i meksikanske pjesme. Tanci su ipak vavek finjevali z onun „Srce laku noć“ od Ivota Robića. Po ten kako pari tancaju dalo se j’ lahko prosudit ki će ku do domi kumpanjat.