(20 meseci mlaja)
Piše: Darinka Martinčić
Kakov je ta naš Zagrad, selo va ken otrok nima vršnjaka ni vršnjakinje ni za igru ni za kunpaniju, užali su naši govorit. Jedina je mala susedska, ma ona j dvajset meseci mlaja. Z tun malun susedskun, osim teh dvajset meseci delil nas je i putić po sred Gaja, umejka mej našemi dvemi kućami. Po ten putiće, po staroj užance pasuju o puste još samo kunpanije maškar.
Počekala san ja tu malu susedsku dokle ni i ona krenula va školu pa više nisan hodila va školu okol Lučetić nego smo šle mi dve skupa va Staju pa proti škole. Počele su nekako z temi leti i naše prve zajedničke igre.
Na brežiće kade se putić ki pride z Gaja križa z puton ki re va goru rasal je veli stari grm. Pofermale smo se mi dve čuda puti pod ten grmon. Bilo j to i mesto do kuda smo kunpanjale jena drugu kad smo se finile igrat. Ma pod grmon čuda puti ni bil kraj igre, nego komać početak. Zmislela se je neka od nas da bimo mogle bit frizerice. A kamo ćeš lepčega frizeraja od debelega hlada, mehke travice i škril na pute kamo se more sest. Za čudo, ta naš grm imel je pul tal mesto spodobno dupju, napošno mesto za držat se ča nan je rabilo…češji i škare od najbojega mogućega matrijala, najbojeh žbic, prašći i palic ke smo našle.
Igrale smo se mi i na Katićeven Kaliće od kuda se j zimala voda za blago. Na našen cepale pod brajdun od fragule, z palicun smo nacrtale krug, podelile ga na pol i igrale se „na zemju“, a bile smo i kuharice. Va vrte smo našle ča od verduri, va štale smo ukrale malo posej, a po ravne nabrale rožic za dekorirat. Kakovi smo samo„pijati“ slagale na pereh od vinuki.
Pasevale su leta. Po malen smo leprinačku školu zamenile z onun opatijskun. Bilo j gušt vozit se z va ono vreme samo “školskun korijerun“ va koj se j našla cela škvadra, a prišle su i leta za prve oćade. Kad bi se dogodilo da kakov mladićac pita – ćeš prit subotu na tanac – leh bin va sebe pomislela – ću ako će mat pustit poć onu dvajset meseci mlaju. I opet san ju počekala kako i za igrat se. Morda ipak za maškare, morda nas puste poć okole z omladinun. Morda za Vazmon? Za Prvi maj će sigurno bit tanac, a na Petrovu ćemo sigurno poć.
Ma pdpravile smo se mi dve kadagod po nedeje zapolne i va kino. Hodeć v Opatiju i z Opatije. Ni nan smetalo ni kad nas je jedanput ćapalo nevreme. Strele su pucale po Baredah, a na Bajokovšćine nas je zalel pjusak. Ni kada smo pasat najgornje opatijske kuće mislele da neki re za nami pa nismo znale bimo šle napred al nazad. Takove stvari se ne moru pozabit.
Dočekale smo najzad i ti naši prvi tanci. Tekle smo veselo, leteć po beloj ceste punoj batudi, i vrnjale se pune smeha i kumedije. Ni nan čuda rabilo za nasmet se. Za sakega z ken smo tancale i z ken nismo imele smo neč za reć i onda udri va smeh. Vrnjale smo se z tanca del puta z Začani, a onda proti Zagradu same, jedine mi dve zagrajanske divojke. I kad bimo prišle na punat z kega re saka na svoju stran, još vavek nismo bile arivale se povedet ča smo imele.
Pasala su leta, čuda se j tega promenilo. Jedino ča stoji su uspomene ke čuvamo i nosimo sobun kroz živjenje. Ni više starega grma ni brajdi od fragule. Naše vnučice igraju se i odrastaju na jedan posensega drugačiji način.