Piše: J.O.Hrvatin
Ovde piše ud belih puti ud Staroda do Miklavlja potlje Rupe, ud starojskega kunfina do kraja rupajskega i ud šumskih puti po kih su vozili vozi z drvi i senon, z gnojnimi koši na njive, ali z lìtinu doma. Po glavni cesti, doklje je još bila bela, na mestih kuda je pasivala poli dolin, su bili niski kameni parakari, niki su njin rekli i štandar. Stran nove asvaltne ceste, puti su bili beli, kameniti, makadamski. Već se jih retko vidi ma da. To se lipo vidi na sliku ku san dobil ud Nenada Smajile, vidi se kočija ka je zglajzala i parakari. Nanju piše Nesreča Pasjak 1910.leta.
Kada je 1933.leta prišal asvalt je selo presikal na manji del Dolanjega i veći Goranjega kraja. Od tega puta se je u Dolanji kraj moralo pasivat priko ceste. Asvalt je donesal veći promet i nas dicu su strašili ko smo se tili poć igrat u Dolanji kraj. „Pazi se kad greš priko ceste“ su nan govorile mame. Ma seglih ni bilo straha kako danas aš je auto bilo čut i vidit već z duga, zgora sela, ud Malega vrha i vrha lokve pa doklje ni prišal smo brzo prepasali. Potlje Staroda, to puta za Sveti Paval pa proti Pasjaku, je livi uvinak (zavoj). Temu mestu Starojci (po njihovu Stárejci) reču Prógan*. Zajno potlje uvinka na Prógani skrene star bel put jako desno i strmo doli. Put zdola na dno je usporedan z današnju asvaltnu cestu. Tuda su progonili ovce pa se zato reče Prógan. Potlje kih četiresto metri skreće livo pred Veliki vrh. To je već Paški kunfin. Tuda su vozili vozi do 1933.leta, prvo asvalta. Bel put je poli Velikega vrha dalje zavil desno na Barišća zgora Sinakoš pa naprit ud Malega vrha do zgora lokve, a otuda je zavil oštro nalivo strmo doli. Prvo skretanja je križina, a na desno bel put na zapad proti Sinakošan, Žlabovican i Strmcu. Strm put je i prvo, livo ud Malega vrha potlje Gradine, čaz Zasela pa pred hišu Ledenica na glavnu cestu. Goranjega i dolanjega uvinka, prvo i potlje sela, ni prvo bilo, a storeni su kada i asvalt.Za prit u selo h Peretovi hiši, kadi je sada spomenik, su vozili poli Kovačove hiše proti hiši Goranjih Kalčovih (Oskarovih) i Neškinih. Dalje je put peljal ud Neškinega uriha nalivo pret Peretovu hišu pa nazdoli proti školi i Štacjonu. Ud Neškine do Peretove hiše je sada škarpa z cestu, a navrh škarpe zid z lajštu (širok ravan del zida) na ku smo rada sedili. Proti Šapljanon se je šlo priko Križ puta desno za na Štacjon, a priko vage i štrike u Šapljane pa dalje proti Rupi i Lipi, ali Permanon. Križ puta se reče zato aš se križaju put zdola sela i nova trasa asvaltirane ceste Pasjak-Šapljane. Ti put je storen još za rimskih vrimen i je del stare rimske ceste Aquileia-Tarsatica (proti Lipi), ceste Via Gemina. Bila je široka četire metre, da moru dvi kočije pasivat jena poli druge.Ni bilo ni dolanjih uvinki zdola sela, unega na Drene, ni za proti Šapljanon (podvožnjak železnice). Za drva dopeljat z Boršta, Paradin, Stanišć, ali Kuti, se u semu z dela Paške gore kemu u Pasjak rečemo Za vrhe, se je u selo vozilo udzat Štacjona pa poli Vage nazgor priko Križ puta. To već znaju povidat samo najstariji Paščani. Za takovu strminu je rabilo četverit – upreć četire vole, ki jih je jimil. Ki jih ni jimil jih je mogal posudit. Zato su ljudi bili dobri jeni drugin. Ruka ruku mije, danas ti meni, jutri ja tebi. Na hartulinu ud 1913.leta je vidit suhozid poli hiše na Štubih. Do zida je bila stara staza ud Štubiha proti Trišćeniku. Ceste tega leta ni još bilo pa se vidiju i suhozidi okoli.
Selski put proti Kazarmeti je ud Bogića, raspela zas križon, ki je zdola crikve pa zdola Kazarmete zavije livo h Brusnu. Za prit na dno Brusna je velika strmina. Ti put je storen okoli 1978.leta. To su puti bliži selu. Za prit ud sela u Mandinu staju i niže predjele Paške gore rabi pasat čaz selo h Štubihu, kadi je danas Dom, i priko Kapužišć pa priko glavne ceste zgora Dreni dalje u goru. Ti put su širili strojno prvo gradnje Doma za peljat drva za Sindikat Luke. U Pašku goru je posičeno okoli hiljadu kubiki drv (tako je delan Dom). Zgora sela livo poli Podurihi je bel put čaz goru, Jurašov laz do Javorine, pa čaz Munsku dragu, Voćar, na asvaltnu cestu Žijane-Mune. Ud Javorine naprit jeno tristo metri su put probili okoli 2003.leta (Hrvatske šume).
U Boršt zgora vojarne su železne šine kol ud voza storile rez na kamik pa se lipo vidi kadi su glajzala. Lip širok šumski put je ud Štacjona proti pećini Loza. Dug je po priliki dva kilometre. Pasiva poli žice aš je zdola, do štrike, bila kazerma pa vojarna, a sada Vježbovni vatrogasni centar. Po putu se danas more s kamionon se do pod Orljak. Zato se za parte uz ti šumsku put reče Podorljak ali Padorljak. Prvo strmine proti Orljaku su parti kin se reče Kuti.
Livo Kuti s puton ki nas pelje h pećini Loza (desna slika) Nadesno ud Kuti h Orljaku je fanj strmno, pa ni za kamion, veći šumski traktor je bil. Ni čudo da je strmo, aš je razlika višine 150 metri. Za prit van na put pod Jelicu se ne more, aš kada su ga Hrvatske šume širile su delali i veći nasip pa su z materijalon ud kopanja založili ti put. To ni pravo, za to se ne brigaju glavni Paščani. Z riti u glavu kiput pride, pride. Med vrhon Jelice, Tatinske griže i Javorine je jedan ravan del gore. Saki rada tote počine, ljudi i blago. Ko skrenemo desno ćemo prit čaz kih 1200 metri na vrh Buričine. To je dvajset minut hoda pomalo. Tote put finjiva, a počne Starojska gora. Ma nasred tega puta h Buričini je jedan za kega moremo reć da pasiva okoli Javorine, on gre najprvo uvrh h Buričini, pa potlje skrene naglo nalivo na mesto kemu rečemo Za ključ. To je mesto z parti zapišeno Križulja. Ti put pride van na uvega ud Javorine h žijanskin Paležon, to se reče ud Javorine proti Žijanan. Jeno kilometar dalje ud Rupe su Tri mosti. Doklje ni bilo asvalta se je zavilo desno okoli briga, pa livo pa opet okoli doline široko na desno, kako da bi potkova, pa opet livo. Za škerc je za reć „lijevo-desno, nigdje moga stana“ kako da put zašemeri. Ti bel del ceste je bil dobra prilika za poć na fraj, mislin da ki Rupljan, ali Rupajka to more potrdit. Za popravljat pute su bile rabóte, bilo je to vrime kada su jimili župane ki su urdinali ke pute rabi delat, ke popravljat. Orudje su jimili, pljuknili u ruke i storili da bimo mi današnji uživali. Jena črkica: ti beli puti su posebna vridnost. Jedan je zapušćen, ud Šapljan livo priko Ciburice, je bila bližnjica kuda su vozili vozi i pogrebi u Jelšane. Bila je i oštarija Kalandra, sada je zrušena. Put ud Šapljan do Brguda pasiva priko štrike. Biciklisti znaju za njega, a kada se predela železnicu pa stori podvožnjak će bit i već hodači, kako i kada smo hodili ud Jušići do Rupe po trasi buduće ceste. Ti beli puti su zato vridniji, po njih hodit je zdravo, ki more.Na zadnju sliku se vidiju parakari ki su se još ubdržali na put za u Brešca.*Ja, još jeno: Progan reču i Šapljanci za mesto kuda su uvčari progonili ovce.
