Piše: J.O. Hrvatin
Bivat ća ud Rike, u Pasjak, na selo, je bilo uživat najranije dičje dane. Saka leska, karuna i sinakoša je bila naša, posebno patok u Brusan kadi smo se močili i kupali u prvu vodu potlje lagamana. Hodili smo po Ulici pa poli Škopljenci priko mesta kemu rečemo Nad Brusan po stazi u polje Brusan.
Prvi spomin na Riku su nan donesli stariji, roditelji i susedi. Ko još nismo šli žnjimi su nan seglih ča donesli z Rike, mama paštakreme (se slašćice su nan bile paštakreme), a stric Stanko Krajnikov „Plavi vjesnik“. On je delal u frmačiju “Ljekarna kolodvoru.“ Kada je kega bolila glava je rekal stricu da mu donese „kombinirani“, prašak u mičkin škartočić. Kašnje kada san bil lovac su mi njigove dobre ljekarnice „za nič“ (besplatno) zmirile prah (bezdimni barut) za delat patrone, aš su jimile gramsku vagu.
Zafin paštakreme san rada jimil minjone ke se je moglo kupit u slastičarnu „Vesna“ poli kolodvora. Bili su politi z čokoladu (kafeni ali sivkasti). Morda su mi se dopali aš su jimili kodabi dno košića i bili su jako ukusni pa jih i danas poželin ma jih već ni takovih z jajci (strah od salmonele). Prve san dobil od mame kada san bil poli none za ferije, za odlične ocjene u školu „Ivan Ćiković Beli“ na Zamet.
Spomin na Riku su i besede ke su nan, malo z govoron, malo z pjevanjon, govorile naše mame kada smo prihajali doma: „lipi fanat z Rike gre, ko ča nese ali ne, samo da veselo gre“. Niki su govorili i „Ki to tapa ki to gre, ko ča nese ali ne, samo da veselo gre.“ To se je reklo kada je bilo čut nečigove petice.
Kada smo šli z mamu u Riku kupit gume (gumarice) smo se i slikali na Žabicu (1957.). Bilo jih je z plavin platnon i belu gumu (kapu) naprit, ma ja san si bil zbral jene sive.
Kot građevinar san prepasal na noge od Gornje Vežice do Zameta, kadi god je bilo gradilište, Gornja i Donja Vežica, neboder B-15 zgora same štrike, Krnjevo-Trafostanica industrija, ulica Jože Vlahovića, naselje Malonji, Zamet.
Na Vežicu je bila drvena baraka z kancelarijami. Rekli smo njoj vikendica. Bili su šefi, poslovođe i tehničari aš se je naveliko delalo toplovod i stambene zgrade na Gornju i Donju Vežicu.
Za toplovod se je kopalo kanale dimboko koliko je čovik, a kompresori z pikhameri su brčili tuta forca aš mehanizacije kakova je danas ni bilo npr. otkopni čekići.
Na Gornju Vežicu su bili „D“ objekti saki zas sojin brojon, a na Donju „B“ objekti. Pa gradilište nasproti KBC Sušak – priko ceste zvano UKOD (ukočeno drvo) po tvornici još ud prve Jugoslavije. U Bistrc su bili delali falersu („Lesonit“ Ilirska Bistrica), a u Riku furnir i šper ploče. Na Donju Vežicu smo delali zdravstvenu stanicu.
Sako gradilište je imilo šefa, poslovođu i tehničara. Na gradilišta po Vežici je tako bilo sedan Jožeti (Jožići, Josipi) pa je za Josipovu užalo bit veselo, a bilo je šest Iveti.
Kada su delali Zavod za zaštitu zdravlja su mu skraćeno rekli Ze-Ze.
Tako su mi spomini na Riku spomini na G.P „Jadran“ Rijeka, poduzeće ko je jimilo 1300 delovci i pogon u Pulu a potlje spajanja i G.P „Učka“. “Jadran“ je gradil u Bistrc (vidi prilog z bolesničke knjižice-zdravstvene iskaznice), pa Riku, Labin (sportska dvorana za „Labudice“, rukometašice, Tvornica lutaka („TTKL 25.maj“ i hale za Kvarnerplastiku, Raša), u Podlabin i u Pulu.
Spomin na „Jadran“ je ostal jedino u mislih zaposlenih i na zgradah na mramorne ploče kadi piše ime izvođača i leto gradnje. Tako je zas simi uničenemi poduzeći.
Na Zamet smo delali i rukometni stadion zdola Doma DTO Partizan namenjeno „II.trofeju Jugoslavije“. Delalo se je z soldi od samodoprinosa. Otvorenje je bilo 29.junija 1971. Na Zamet smo gledali tadanje najbolje svjetske rukometaše , svjetske prvake Rumunje pa Jugoslavija“A“ i „B“ i naše – reprezentaciju Rijeke. Potlje turnira je igralište prezel RK Zamet pa smo gledali njih, muške i ženske.
Rukometašice i rukometaši su bili naši školani z škole „Ivan Ćiković Beli“ kadi nan je učitelj Stanko Jerger predaval matematiku i vježbal igračice. Z manu u razred je hodila Marija Perković. Spominjan se puno njih, napisat ću samo nike – Branka Strišković, kapetanica, Nada Perković, Vitka, a bil je i Čiči i drugi muški. Bivali su okoli nas i škole, na Zamet, u Novo naselje zdola škole.
Spomin na Riku i GP „Jadran“ je i moj tata. Prvo nego u „Jadran“ je delal u Zadrugu građevinarskih radnika-Rijeka, a zdola je pisalo Cooperativa fra operai edili-Fiume (1946. i 1947.). Pod „Jadran“ je delal kratko vrime 1948. leta u Šapljane, u Boršt, za bazene, a i na gradilište „Jadrana“ u Bistrc 1956.leta.
U „Jadran“ je bil savijač železa (armirač) i poslovođa, vodil je knjižicu šihterica o prisustvu na delu, pisal radne naloge i obračunaval prebačaj i nosil u upravu, se on jedini. Obračune je delal ručno. U njegovovrime Pogon savijači je bil najuspješniji pogon, kašnje OOUR, od sih OOUR-i. Nosil je obračune i doma pa san ga bil pital da u radni nalog piše da je jenemu savijaču zapišeno osan ur, a znan da je bil doma. Rekal mi je da ga je pustil doma za košnju, a on da je prišal postavljat železo u nedilju, aš da ćeju po planu u pandiljak tesari šalovat ploču. Prikovremeno se je plaćalo 50 posto više, ma njemu se je pisalo osan ur za osan.
Sako gradilište je jimilo soj timbar. Od zanimljivih dokumenti je i platni list od 1958. leta z timbron „Jadran“ građevno poduzeće Rijeka, gradilište „ Kupatila u luci“.
Mi smo već jimili mašine za računat, najprvo tip „Zagreb“, koj smo rekli broštulin aš je je bilo jako čut. Napredak je bil džepni kalkulator „Digitron“ z Buj, prvi takov u Evropu.
Već u drugo poduzeće san prepasal Kozalu, Škurinje – Sportska dvorana škole R.Tomšić, pod cestu zdola Cento celle, pa Tvornica papira, na INA Mlaku (uprava i ERC) i pogoni u Urinj.
Potlje san u upravu delal kalkulacije z kalkulatoron „Vektor-2“, jimil je papirni trak za kontrolu i žnjin san delal jako brzo.Tehnika narodu!
Reče se da ćeš mesta najbolje upoznat ko jih prepasaš na noge. Ja san.