Piše: Nikolina Morićeva
A judi moji, ča nas je ovo ćapalo? Nevera za neverun, i ne vidi se kraja… Kako držat užancu z lumbrelami ke nosimo aš da su ča, ma niš ne pomoru?
Jutra su nan Si Sveti, poć je po staroj užance obać si naši, z rožicami, sisvećnicami, zapalit sveću , morda reć Očenaš za seh i povedat š njimi, potiho, va se.
Si su tu, naši… I si su z nami, aš ih se spamećujemo, i nonić i bižnonić. Ča su govorili, čemu su se smeli – a tužili se nisu, aš ni bilo lazno. A morda se spametimo i ča bi rado pojili i popili, i ke su užance imeli. Na potiho smo skupa, prez besed, va srce. Lih jugo pešta, hita lumbreli, nebo se rastulilo, a vali razjadili.
A ča pak oni misle kad gjedaju odnekuda na nas, kako hodimo i govorimo sami sobun – mobilni v ruke, slušalice se ne vide va ušijah – ča je to svet pošempjal? Si su ponemeli, a nikega ni da seh teh pošempjaneh kemu duhtoru peja?
Na potiho smo skupa, prez besed, va srce. Samo jugo pešta, hita lumbreli, nebo se rastulilo i vali razjadili.
Na drugoj strane sveta, va Meksike je to fešta. Judi priprave se ča su njihi voleli pojist i popit, se ukrase z rožicami, store oltari i vesele se, veruju da će tako prizvat svojeh, da njin pridu ovisti jedanput va lete i sretni su bit si skupa.
A morda i mi i vi skuhamo danas ni jutra neš ča je neki od našeh stareh guštal?
Semi nan dobri Si Sveti z našemi dragemi ki nisu, ma su pul nas, i zavavek z nami.