Si sveti su pasali, ma gospa Darinka z Leprinca nan je poslala jeno sjećanje na taj dan i na naši stari, pa ga sejeno objavljujemo va Škabeline:
Leprince j’ ovo leto bila maša, a za ten blagoslov grobi na tri ure zapolne, za razliku od zadnjeh let kad je to vavek bilo nekako opolnu. Spametila san se tako vremen kada Si sveti nisu bili blagdan pa smo i onda hodili zapolne na cimiter i va crekvu. Na Si sveti, kako i saku nedeju, maša j’ po onoj kasno j‘ zapolne h maše poć bila vavek do polna, zapolne j’ bil blagoslov.
Na Si sveti smo nekada uževale poć skupa odbavit užancu, mama i ja. Okol Staji pa zgoru po Presike do cimitera. Mama j’ zela boke rožic keh je našla va vrte. Najveć su to bili jeni drobni lilasti cvetići ki su mogli podnest prvi mraz kega j’ nekada skoro sako leto već bilo ta štajon. Va boršu j’ stavila fuminanti i šterike ke j’ prnesla z Opatije.
Kad je finil blagoslov, judi su se kako i sada pomalo spušćali va cimiter i zmešali z onemi ki nisu šli va crekvu. Saki bi stal pul svojga groba i počekal da pasa velečasni i da skupa z grobon kadagod i njih pokropi z kapon blagoslovjene vodi.
Mislin ja tako, zač sada nijedan na grob ne stavja šterike. Zato aš ni zemji va ku se jih more zabost. Na cimitere j’ nekada bilo samo par spomeniki od prvoratneh bogatejeh familij. Se drugo zemja. Ki j’ imel va familije al va rode kakovega zidara, dal je storit okvir od petona, ki ne, ni to. Na mesto nadgrobne ploči z imeni seh pokojneh, na grobeh su bili drveni križi z imenon onega ki j’ zadnji umrl. Grobi su se počeli boje urejevat kad je prišal zakon da se more za trajno zakupit grobno mesto. Dokle tega ni bilo grob je, reklo se j’ tako, nakon toliko let bil prekopan, a kosti su prenašane va depožit, ki j’ i sada va kantune od gornjega dela cimitera.
Prišlo j’ tako vreme od mramora. Da j’ bil neki ki j’ rekal svojen mlajen – ne zavalite name on kamičinu aš neću dihat moć. Nisu ga poslušali. Sada su na seh grobeh, ako ne mramorne ploče, onda baren peton i pešćići va kvadre od mramora. Prišla j’ nekako s ten i moda od krizantemij. Pojanske placarice su prve počele gojit i prodavat turnerice. Prišle su za ten špine, bekerice, lončanice….mesto boka va mode su aranžmani…bele šterike zamenile su sveće va črjeneh plastičneh lampijoneh. Ni familije ka za ta dan ne bacela grobi od svojeh ča boje uredit, a ne gleda se ni potrošit.
Još jeni Si sveti. Stojin sama pul groba od onega z ken smo na ovo tužno mesto skupa sprogodili seh našeh starejeh. Ono vječno pitanje – zač te ni, i misal da nas seh čeka takova jena mića particela.
Čuju se koraki po peske. Cimiter se pomalo prazni. Z prven mrakon plamiki sveć se su jači. Promenjuju se kolori. Krizantemije i mokro veje. Dih pozimka.