Piše: Darinka Martinčić
Bivan na starine od svojeh nonić. Iman sedan let, jušto toliko da već moren složit va sebe slike od sega okol sebe. Najraja sedin i pišen zadaću na salice, na jeloveh skalineh keh je otac dal storit z daskami od vele jelvi ka j rasla pred kućun. Kad je mrzleje, sedin na špargete, boje reć na produženen dele našega velega zidanega špargete kade j vavek teplo. Napi se ne domišjan. Mama ju je dala zrušit vaje za raton aš da su se va njoj bili zalegli žohari. Povedali su za tu napu da je na njoj pul sega drugega, va jenoj oškrbjenoj bukaletice bivala munida za pekjara.
Po špargete se vrte padele i pinjate. Kad se palenta kuha i kafe broštula, znamu se kolonbari, a znamu se kadagod i pod padelun da brže zavre. Va najvećoj padele vre hrana za prasca, drobni prašći konpirić, peša i repa zrezana na kusi, a ako ni doba za kuhat ni juden ni blagu, pride roba na red – lancuni i bjankerija. Stavi se i to prokuhat va napošnen velen žinganen lonce.
Vodu kalamo z šterni. Va kuće vavek mora bit vodi – mrzla va siće na ken je obešen paj, a tepla va kotle od špargeta. Na kotle se luštri rameni pokrov, a z boka špinica za utočit.
Mama sako malo požuli z škartačun drveni stol i potloh opuke. Pul stola su katride da se more za obedon sledić nagnut na stol i zakimat, a škanj zad vrati dobro pride za život zdricat. Kuke zavidane za štuk rabe za obesit mokru lumbrel, a ako rabi robu sušit, samo se špag rastegne. Ne znan zač su na poneštrah stavna železa na križ kako da smo va pržune, a z vani su još i železne vratnice. Teške pak vanjske vrata odprta su zimu i leto po cel dan. Znak je to da j neki doma i da j kuća odprta za sakega.
Pred dve tri leta prišla nan je struja tako da sada na sred štuka visi i luster – lampica zavidana va grlo pokriveno z emajliranen, od zgora škuren, od zdola belen pijaton. Ta lampica je i se ča imamo od struji. H blagu se gre z felaron, a ni po vane ni svetla nigde. Mama ne more prežalit staru lampu na petroju ku j mačak razbil, a rabila je ta lampa i kad san se ja rajala i kada mi j babica Carafina z Opatije prišla uši prošupit.
Kad je lepo vreme, najraja san po vane. Igran se pred vrati, zalejen rožice posajene va otučeni stari lonci, tiran kokoše z taraca, ren pobrat ča od žira po vrte i okol kući, z vejnice prnesen veja, a z cepala prašća za oganj snetit. Najlepče je kada mama i ja grabimo skupa veje i kantamo.
Bivan na starine od svojeh nonić. Sedin na kauče i gledan televiziju. Iman sedandeset i sedan let, jušto toliko da se još vavek moren vrnut i zbudit va sebe slike od onega kako j bilo i ča j nekada bilo tu pul nas.
Manje poznate besede:
Pekjar – prosjak,
Žingo/žingani – cink/pocinčani
Paj/pajčić za vodu zajet – zaimača
Ram/rameni – bakar/bakreni
Zakimat – sledić pospat/zatanjat
Život – škina/leđa
Štuk – plafon
Žir – voće/voćka
Veje – suho lišće