Kada se je mliko ud krave pomuzlo, se je dilo u padelu ud okoli 3-4 litre, pa na šporget da zakuha i pustilo da se uhladi. U padelu ustane zakuhano mliko, a po vrhu se stori škrljub. Pride tanji, ali deblji, ko je mliko manje, ali već gusto, ko je masno već ali manje. Nike krave su jimile već masno mliko, nike manje, ko su jile bolju ali slabiju hranu.
Škrljub se pobere zas šnjefaricu, ali z drvenu žlicu i dene u pasudu. Pobira se par dni da se ga nabere morda okoli litre. Pozatin se dene u pinju do malo manje ud pol višine. Pinja je drvena i ukrugla pasuda storena z dugimi i uskimi dužicami kako i bačvice. Ko je bila manja njoj se je reklo pinjica. Doli je šira, gori malo uža. Visoka je čoviku do kolen. Jima i palicu, držalo ko na dolanji kraj jima ukruglo drveno kolo zas škuljicami, malo uže nego pinja. Držalo je duže ud pinje jeno 30 cm.
Po vrhu pinje je pakrov ki jima manju škulju čaz ku pasiva palica kada se tuče, pasiva doli-gori. Prvo lego počet tuć se prtisne pakrov na pinju, se zapre da je na trdo. Tuć znači dosti brzo i jako pasivat z tu držalicu u ruku udzgora nadoli, do dna, tako da uno kolo tuče po škrljubu. Reklo se je da ćemo umest putar. Naša mama je stisnila pinju med kolena i tukla, je i nona, a smo i mi dica. Nan dici je to bilo štufno, nikat kraja, i ruke su nas brzo zabolile, pa smo rada ća ušli igrat se.
Rabilo je mest fanj cajta se doklje ud škrljuba pride svitložut putar. Kada se počne sprijimat za kolo na kraj palice je tučenje (metenje) finilo, je putar storen. Za storit maslo se je putar dilo stopit u padelu na gorak šporget, na mičkin uganj, ne jako nagajcano. Reče se da se maslo friga. Kada se stopi triba jos malo mišat z kuharicu pa na dno padele ustane zrnast kafenkast talog kemu se u Pasjak reče grampa, a zgora, do vrha padele, je škuro žuto maslo. Se skup se precidi zas siton ud kafeta pa ustane grampa, a maslo u padelu.
Rastopljen putar, maslo, se zažuti i je škurije ud putra. Ki put se neće storit, pa ustane samo grampa. Ud tri, četire litre mlika je pride unako za jeno sito, a zgleda kako mrve ud kruha kada se popeču. Hladnjaka ni bilo, a naše none su znale da bi se putar brzo pokvaril, bi zaplesnivil, a da maslo more dugo stat. Zlije se u pasude ud porcelana, ali u staklene važiće. Užalo se ga je zanest na mrkat u Riku. Za domaću porabu ga ne rabi divat u hladnjak nego na mrzlo u špajz.
Bila je navada z maslon umisit vazmenu pogaču, na Svetega Jožefa skuhat štruklje z maslon, a porodnici dat da poji supe z maslon da je ukripi. Z maslon se je jilo i pržganu juhu i palentu i makarune.
Grampu se namaže na kruh, najveć dici. More se i potoćat s kruhon, polit po palenti, ali zmišat žnju, ali se stori njoke z grampu. Nan dici je bila grampa dičje veselje. Tin jidačan se reče palenta z grampu i njoke z grampu. Ki je jimil blatan vrat mu se užalo reć „grampa ti je za vrat“.
Med prvimi učitelji u školu Pasjak je bil Anton Maslo. Učil je dicu po slovensku (i Slavoj Makarovič) tamo 1923-24. leta. Dica su mu se špotala maslo grampa, maslo grampa. Ko rečeš učitelj Maslo, će budi ki reć maslo-grampa.
Mlika kakovo je bilo se retko dobije pa se danas storiju maslo i grampa s putra. U Brce h Belanovin smo još dugo užali poć po maslo, za dicu i zase.
Gamȍlje, ali gomȍlje, i kuljȁda
Kada se krava steli uno prvo mliko je najmasnije, je gusto i žuto, a namenjeno je telićon. Mora se zmust, drugače bi kravi sunilo u vime, bi ubolila i mogla krepat. Temu prvemu mliku se je reklo kuljada.
Kuljada se zmiša z muku i dva jajca. Stuče se u pasudu zas žlicu i kada se stisne se to testo zas žlicu dene kuhat u slanu vrelu vodu. To su gamolje, ali gomolje. Ji se jih same, ali polite z grampu. (Povidali su Alma i Milan Kresević, Neškini, Pasjak)
Napisal za u knjigu “Naši ljudi i navade” Josip Orlando Hrvatin