Namesto da smo šli dica u podne malo spat,
raje smo tekli po selu zas puškami se jigrat.
Zas Nimci i partizani smo bili tako zaštrigani,
da smo se cele dane borili, kot malo
podivjani.
Se je bilo dobro doklje ki put, ni til nidan
Nimac bit, aš si smo tili bit partizani,
ki ćeju se za slobodu borit.
Ud vojaki nismo niš jako znali, samo to,
da su jeni bili dobri, a drugi jako slabi.
Potlje jedan dan, jušto malo pod noć,
po selu se je moglo čut, kako partizani
napadaju Nimce,
kin ni bilo već ča pomoć:
»Prvaaaa proleterska na juriiiiiš, Druuuuga
skupa u stroooj, gremoooo prsa u prsaaaa,
gremo si u booooooj,…!«
Naš je Milan Barba tako glasno kričal,
kada je po selu tekal i strah nan u kosti
tišćal.
Ni sanjalo se nan ni, da je on bil pravi
borac, ki je Neretvu preživil kot 16 letni
mulac.
Ranjenike je rišaval i na ruke jih mogal
nosit, a danaska nan je teško o temu i
govorit.
Mali junak, SKOJ-evac i kurir,
to je bil Paščan Milan podbiškega roda sin.
Partizane i Nimce smo potlje pozabili,
a današnja dica jih za jigru nisu već nikada
rabili.
Besede: zaštrigani-začarani; podivjani- divlji; kin-kojim; potlje-potom; jušto-upravo; tišćat-pritiskati;
mulac-mladić; SKOJ-Savez Komunistričke Omladine Jugoslavije; Podbeže-selo u R Sloveniji.