Piše: Josip Orlando Hrvatin
Treti put od 2020. leta udruga matuljskih penzići na jeno mesto, matuljski Hangar, je složila ljude ki pišu i govoriju po domaće, jezik sojih starijih. Čakavski kot jezik priznat posud po svitu pa već nećemo morat govorit da je to samo mjesni govor, narječje ali dijalekt.
Posebno je bilo lipo čut žejanski. Bilo je lipo vidit i nike ljude ki su prišli pri put uživat pošljušat domaće besede, tamburaše i provat pusne slatkarije od Mun, Šapljan i Rupe do Matulj. Dom je bil pun (okoli 130 skupa z izvođači i publiku).
Pusno je vrime, pust uvo leto 21.2., kako i Međunarodni dan materinskega jezika, pa smo se odlučili družit ranije, 11. 2. 2023., od šeste ure navečer.
Z mikrofonon nas je prozivala prof. Nina Dukić Srok. Kako lani i uvo leto je dopeljala soje čakavce zas škole “Sveti Matej” Viškovo pa smo jimili čast pošljušat najprvo njih. Nastupali su:
Julija Cetina, Mateo Arapović, Patrik Host – oni tri su sedmi razred, a žnjimi su još bili Moreno Srok i Zara Načinović- oni dva su treći razred. Recitirali su recital “Moj kraj”.
Potlje su nastupala dica čakavske grupe OŠ „Andrija Mohorovičić“ Matulji – z III-A razreda je Sara Grgurina recitirala i glumila „Novi brhan“ autorice Silvane Milotić Mentorica je uč. Nataša Milković.
Igrokaz „Ježić“ autorice Ivanke Glogović Klarić izveli su čakavčići IV. B razreda škole Matulji i to Nikola Travaš, Linda Palmić, Lana Kalčić, Maja Kastelic-Frangeš i Marko Matušić. Njin je mentorica uč. Dunja Krnjatić.
Po žejansku je govorila Adrijana Gabriš u sastavu „Žejanski le zvončar“, pozatin Milovan Matetić, Zvoneća u sastavu „Drevo i drvo“ je povidal ča se rabi storit, od poć u goru po drva do sest i grit se blizu gorkega šporgeta. Pozatin su nastupili Enica Mićić zas sastavon „Moja nona Tereza“, pa Klara Lazar, Brešca zas sastavi „Užanca “ i „Pust“, Nadija Škerjanc zas sastavom „Dar“, Vlasta Šepić z pjesmami „Ljubav“ i „Pak ča“ i Nada Dubrović ka je prečitala „Samo lata“.
Orlando Hrvatin je zas sastavon „Ja, Belo kafe“ opisal sojega kućnega ljubimca, mačkona.
Publika je uživala pošljušat tamburaše orkestra „Zametski koren“ kemu je voditelj Zlatko Laušin. Kako se spodablja počeli su zas skladbu „Mili kraju rojeni“ posvećenu Zametu. Med prozu i poeziju i na kraj svirali su po četire skladbe i na kraj još jenu za „bis“ ča je iskala zadovoljna publika.
Kuharice „s terena“ spekle su štruklje (Rupa, Pasjak), presnac (Zvoneća, Brešca, Bregi), grášnjake (Jušići, Rukavac), po staromunsku štrudalj, fritule, pitu z jabukami i munski kolačíći, kroštule (Brgud), krofe (pohanje, ulenjaki, puhanci), se ča se stotine let dela po selih u pusno vrime. Kako se reče saka vas soj glas tako je bilo i saka vas soja slašćica.
Za se ki su tili je bil pijatić slatkega pa se je moglo z „prve ruke“doznat ko selo ča umisi i speče. Podeljeni su buketi pusnh rožic od krep papira, ručni rad članic i zahvalnice Udruge, a muškin, se zna, boca vina.
Saki put posebno veseli skupno pjevanje potlje predstave. Iskazali su se naši stalni zabavljači Velimir Baćić i Željko Valenčić z gitarami, a ton njin je daval berdaš „Zametskega korena“.
Ja, Belo kafe
Bil je lip dan kada su me donesli doma. Ona i on se brigaju zame. Navadil san jih da mi otpru vrata za na balkon. Ne razumiju da mi vrata ni za zapirat ni da biju jih mogli smiron držat utprte pa da ne pohajaju toliko puti aš ja moran ubahajat po sojemu komunu. Ona se razjezi name i mi govori da će me prodat. Ki put i zakune aš misli da nisan razumil. Kada je takova se držin malo dalje. Puno mi vredi aš mi nosi hranu pa kada pride pohajan okoli nje doklje mi ča ne dene u pijatić.
Ma već kada zašušnja znan da je nutra ča za pod zub. Razdebelil san se ma bolje debel nego lačan!
Fanj cajta je on z manu ma mi ne dava kako ona, znan da ne razumi pa ga i ne pitan. Pred par dni mi je rekal da san Šapljanac, aš da ne rečen mrmral nego mrmrau. Po pravu reć čin zagledan nju u hišu njoj rečen mr, ali mrr-ma, ali mr-mra pa ona pomisli da san njoj rekal ma-ma. Krivo, aš ja bin til jist.
Malo po malo san jih navadil pa me već razumiju i mi reču da san treti član familije. Temu je pomoglo ča su fanj tega prečitali ud mačjega roda, još su si i kupili jenu knjižicu. Razumili su da oni meni ne moru bit gospodari, jur nisan brek. Gospodar san ja njin, ona mi je kako mičkina mačkica, a i on mi je takov, samo ča su veći ud mene. Ja soju narav ne minjan, ja san mačkon i tako je pa boh.
Miši kadi smo ni pa jih ne moran lovit, a ona i on su već udrašćeni pa mi ni kako mačkan u selo. Zato zame reču da san njihov ljubimac.
San zadovoljan da čistiju za manu pa utkako smo ovde su mi storili mesto z piskon kadi se moren po…i pi…Dan njin znat kada rabi učistit aš san storil samo jeno, a drugo da bin još moral. Kada storin jeno i drugo san vesel pa se naskačen do njih, a kiput storin i fintu, zdignen hrbat i se nahrhurin i prpravin za napad pa se držiju dalje ud mene.
Posebno mi je lipo povidat da se veselin kada ona pride nutra z kakovu škatulu. On je je već navadil da se je ne mora zajno razdrit. Ne bite vervali kako vavik donese hrtunsku škatulu jušto na meru zame. Lipo se ugnjezdin uvanju i utspin veći del dana.
Ću se pohvalit da rada posvojan njihove šlape za po hiši, seden na jenu ali obe i tako mi je lipo da se ne bin rada žnjih maknil.
Uno ča mi ni bilo lipo je kada su me otpeljali h jenemu ubučenemu u čeleste flajdru. Nikat prvo ga nisan vidil i ne bin rada opet aš nisan mogal uć, tr kamo bin da ujden, aš meni je doma za podnest. Tamo me čeka moja škatula i moje velike mačkice. Tamo je moj svit.
On se veći kus noći rano stane, a ja ga čekan pred vrata ud kambre. Nisu utprta ma zna da jih rabi poć utprit. Fali mi ona pa njoj gren malo pokrampljat po vratih kadi spi. Čujen puno puti da ni stin zadovoljna, ni za povidivat, ma se stane, leže na kauč i sada je red name. Ugnjezdin se i ja poli njojinih nog, med stišćena kolena i tako utspimo skupa.
Drugače san zadovoljan, malo san na balkon, a malo skočin poli okna u kambru pa gledan tiće i susedove kokoše u vrt, ma pride u vrt i kakov mačji svat pa mi vrime pasa. Ni mi drago vidit dvi mačke da se karaju, rada bin jeni pomogal, još san junačan pa bin rada malo zakrampljal jenu ali drugu i storil reda, ali ne moren van pa se jezin na njih. Aj joh kada vidin tića mi zubi sami škriplju, aš bin ga, ma mi ni dano.
On mi je dal jime Belo kafe aš da jiman takove farbe po sebi. Takov san da se ne javin kada biju me zazvali po jimenu. Ja razumin njihov glas, ko je miran ali nervozan, ma jime ne dan.
Bilo njin je smišno kada je nju prišla ubiskat prijatelica. Dopala mi se je kumpanija pa san til skočit h njoj u krilo ma bi reć da san je ustrašil pa mi je zakričala Belo kafe-ne!
Njin je to bilo smišno, a meni je seglih. Jur nisan brek, njemu neka reču kako ćeju. Brek bi jih još i pošljušal ma ja san svoga tela gospodar. Ona mi još ud dragosti reče Kiki ma neka njoj bu.
Oni dva rada sediju na kauč pa kada malo zamrnjaučen, ma malo, samo mr, ali mrrr, vidin da bi on rada da priden h njemu pa mi pokaže kamo da skočin pa dan. To mi stori milo pa pojišćen da me pogladi i dragomajni, pa me da – malo okoli ušes, pa po glavi. Zato mi je zrekal da san mazovjecki. Neka san ča san samo neka ne stori ud manje aš mi je tako lipo.
Skrampljal Belo kafe, 11.2. 2023.