Piše: Marijan Knez
Pred par let, rički gradski oci su videli kako se ljudi va gradu greju pocurat va kakov portun al’ na kakoven kočulu pa su zglasali da se takov nepodoban akt treba grdo kaznit z par sto kun. To ča Rika nima nego jedno dva al’ tri javna toaleta (ča nima ni danaska), nisu zeli va obzir, leh je važno bilo malo napunit gradsku blagajnu. Pa ti curaj i plati ili moreš pušćat va gaće!
DA BOG TI SE CURALO!
Šal san va grad, kamo retko gren,
aš niman poč, a i niman s čen.
Poć ću na kafe, a morda i biru,
aš me dvajset kun va žepu ne pušćaju na miru.
Poć ću na placu, ma gledat samo,
aš drugamo i niman baš kamo.
Nosit ću karte punu vrećicu plavu,
neka ljudi misle da nosin meso al’ zelenjavu.
Do ribarnice danas neću ni poć,
aš bi mi od želje puste zlo moglo doć.
Pogljedal bin škarpinu, tunu, pišmolja,
sjetil se kad san mogal, na vrimena bolja.
Sad doma moran, aš mi je preteškalo,
toaleta ni, a z lokala bi me stiralo.
Pasiva gradski otac, do koga ni mi stalo,
govorin za njin: ”Da bog ti se curalo!”
