Piše: Sonja Vlah                                                              

 

Pred deset let smo se počeli vadit tancat va Hangare. Ovo leto, 19.7. va amfiteatre smo tancali peti put, se va sen jedanaesti.

Kako i va Hangare za čakavsku večer ovega leta, storili smo scenu oštarije na pozornice – četiri stoli za pjevači, a jedan za kartači.

Med pjevači su sedeli i naši počasni člani Nevia Rigutto i Francesco Squarcia. Kantali su med saken “blokon” tanci prven, drugen i trećen.

Za uvod pred tanci je Damir Širola zrecitiral pjesmu Dragota Gervaisa “Tanac”.

Kada je Francesco zafikal va pravi fičić i najavil svoju pjesmu “Ajmo Rijeka, forza Fiume”  se je va publike čulo poseban uzdah.

Igral  je za podmladak NK Rijeka kot pionir i junior, a kašnje kratko kot senior va rečkoj Lokomotive i Opatije. Rekal je da kadagod je čul tu soju pjesmu na radije da je Rijeka dobila utakmicu.

“ Samo Rijeku volim ja…i moje srce zna…forza Fiume canta la citta

…la vittoria e la felicita”, alé!

Jena za drugun se je vrtela muzika, klasična i moderna, rokenrol, engleski valcer, tango, pa rumba,

cha cha cha i quickstep, pa slowfox, bečki valcer i na kraje line dance Jeruzalema pa poklon publike.

A Nevia i Franceso? E – oni su par pjesam otkantali saki posebe, a za ten i skupa još dve pjesmi po keh ih već si poznaju: Tri nonice i Kamo j` šlo.

Kantalo je deset penzići pa se more reć – imamo Matujske vokaliste. Se zna – š njimi su kantali i naši počasni člani.

Dokle su penzići kantali Staru pojku su je dva pari na podije tancali, a pokle još dva z publiki.

Kako i saki put penzići su se nadelali i to rabi posebe spomenut. Jeni su krcali, vozili i posložili stoli i kantridi, boce, šifon i žmuji, a na kraje vas inventar otpejali nazad va Hangar. Drugi su va Hangare rezali pršut i sir i slagali ovali z hranun pa odnesli na tarac dvorani, za počastit gosti. Isti ti su ih i dvorili.

Vesna z Zatke je prnesla hortenzije za ukrasit pozornicu.

To je ta “logistika” ku ni videt ali se po njoj pozna kakov si domaćin. Domaru Goranu posebna hvala da nan je parićal podij i tarac i da nan je vavek na ruku.

Saka takova manifestacija je prilika da se opet vide, pozdrave, zagrle i obušaju stari znanci i prijateli, a gore na tarace pogovore, uz jidaču i pijaču.

Po svemu ovo je bila još jena posebna večer kakovu store samo dobri organizatori. Z gušton moremo reć – da bimo i kletu. A kega ni bilo, a pripadalo je da pride, bez takoveh se more. Mi smo svoje dali od srca.

Hvala sen ki su nas prišli gledat i dopejali dečicu. Bilo je judi z bližega i daljega, z Dolenj ma i z New Yorka aš za dobar glas se daleko čuje. Pridite nan opet.

Hvala našen učiteljon Duškotu Đurđulovu i Valteru Hrabaru ki su od nas storili neš za lepo videt.

Pred nami je letnji počitak, a već va setembre ćemo se videt va dvorane za Europski dan jeziki.

Fotografu Damiru Zamaklaru hvala za sliki.

I za kraj: na Lokvine je 28.8.2025. od devete uri večer svečarski koncert Nevije i gosti ki će kantat fijumanske i čakavske pjesme. Tako će ovo va Kastve bit posebna večer od dijalekti.