Mladi fažoleti će ovi dni postat hit na place, a va našeh njivah ćemo još malo na njih pričekat. Evo nekoliko mod za kuhanje ove zdrave verduri. Recepti su z knjigi Jelke Žilić “Va kotliće zmešano”.
Na salatu
Rabe van fažoleti, česan, sol i papar. Fažoleti se skuhaju va kipućoj slanoj vode. Kad su skuhani, ocede se i stave va zdelu. Zajedin se pouje i poocte z vinsken octon, popapre i provaju ako su dosta slani. Neka se ostude. Prilog – palenta od griza, ribe, al meso (suho-friško, junetina-praščevina).
Na kumadoreh
- Kilo fažoleti
- dva do tri kumadora al konšerva
- dva do tri konpira
- kapulica
- česan
- žlica muke
- sol i papar
- petrsin
- uje
- žlica vrhnja
Očistimo fažoleti (odrežemo jedan i drugi okrajak). Ako su fanj dugi narežemo na kusi, operemo. Stavimo kuhat konpir, pa kad voda zavre stavimo i fažoleti. Neka se se to kuha va malo vode.
Kumadori potopimo va vrelu vodu, olupimo kožicu i stisnimo ih malo da zijdu paškvice. Na dve žlice uja stavimo narezanu kapulicu i kumadori neka se ofrigaju. Posipamo muku, malo promešamo, dodamo narezani česan, petrsin i podlejemo z mrzlun vodun. Lejemo va fažoleti z konpiron. Posolimo, popaprimo i kad par puti zavre (okol deset minuti i pazite da se ne prismudi) dodamo prej nego stavimo na stol dve žlice vrhnja za kuhanje. Žlica domaće vegete ne bi škodila. Za prilog – kombasice. Provajmo!