Piše: Josip Orlando Hrvatin, julija 2023
Miseca julija ali angušta, kada su noći već preteple, već se i u selo u kambru spi brez ruhe (plahte).
Mi dica još ne spimo. Zdrava Marija još ni zazgonila, još se ne čuje zgon pašaške crikve. Seglih matere već jišću dicu i zduga se čuje kako zazivaiu: Jožić, Mile, Edo, Lidija, ala hote doma, aš će bit škuro.
Triba pošljušat, ma još bimo se jigrali. Par nas gremo z Dolanjega kraja čaz Ulicu gori, h hišan, pa ćemo se još pojigrat okoli hiš, glavno da su matere zadovoljne. Gremo se jigrat na partizane i nimce, bit će škuro pa se je kadi skrit.
Gren u staru, napol zrušenu hišu i u graju zagledan da niča sviti. Za jigru me već ni briga, malo desno niča leti i sviti kako uvo u grm. Denen ruku zdola, a zas drugu stresen u nju tu ljučicu i brzo stresen nazad, aš to je kako niki tepal črv. Sada leži zdola mene pa zagledan bolje. Aj joh, kot da već nisan nosil u ruke gusinicu i črve sih vrst. Zamen nazad tega črvića i pokažen mami, a ona mi otpovrne: ” Ej sinak moj, ča ne poznaš ljučicu, črvića ki sviti, mi smo se tega nagledali kada smo se z blagon vrnjali u selo. Ki put bi blago samo prišlo aš smo zagledivali te svitleće črviće.
Najlipče biju svitili zas kakove škaljbice ud kamika. Zgledale su kako nika ljuč po putu, premičkina za posvitit put, magari je put bel da se i po noći vidi hodit.
Utac je dodal da puno puti zgleda kako da črvići rastu u travu, da ko jih je već zgleda kako svitleća trava.
Meni su lipi kakovigod, već zamišljan da jih stotine leti skupa kako jena repatica. Zaželit ću da, kada bun velik, neću nikada jimit šjatiku kako sada doklje uvo pišen.
U selu Vranja mu reču svitlìć, u Matulje i Kastav ognjìć. A poli Vas?