Va staren Škabeline smo svojni objavili Čakavski besedarij Radovana Tadeja. Interes je bil velik, a ni ni čudo, aš ima velo znanje od zajika, čuda voji za se to napisat, a s ten i puno duha pa se čovek mora više puti nasmet kad čita taj koloplet domaćeh zlobinjarskeh besed, značenji i narodne šegavosti od judi ki su se te besede zmisleli. Danaska va Škabeline pročitajte zadnji prilog Radovana Tadeja za Čakavski besedarij, a jedanput ćemo morda ponovit i cel njigov opus.
BESEDA-BESIDA-BESJEDA
(zadnji prilog za Čakavski besedarij)
Imenica beseda, besida ali besjeda javlja se va celcamentomu hrvackomu govornomu prostoru, va simi obliki refleksa staroslavenskog jata. I sama beseda j staroslavenskog porekla, a njeje značenji nij samo rič, aš ona znači puno više
od toga: i govor, i slovo, i divan, i Evenđelje, i propovid, i zajik… Kako ima praslavensko ishodišće nahajamo ju va simi današnjimi slavenskimi zajiki, a va hrvackomu zajiku ju čujemo va sa tri njegova naričja.
Jušto ta hrvacki lingvistički troplet s tri organska naričja, uz puno dijalekti i mesnih govori, davaju hrvackomu zajiku njegovu specifičnost i samobitnost, pa su najbolji odgovor na nakane otimanja i negiranja hrvackoga našega zajika.
Punopravno uvažavanji sih hrvackih naričaji jedina j brana tomu i takvomu zajičnomu imperijalizmu!
Takove vrednote kod što su čakavšćina i kajkavščina morale bi bit štimane i uvažene, prez prezira, omalovažavanja i diskriminacije prama njimi, čemu smo bili svedoki, nikad više-nikad manje, va sto i pedest zadnjih zajikoslovnih let.
Diskriminacija: autori ki pišu na dijalektu su prognani va posebne, izdvojene časopise, rubrike, naklade, preglede i antologije. Prezir: celo dijalektalno stvaralaštvo smatra se a priori manje vridno. Omalovažavanje: dijalektalne riči
kvalificiraju se kod neknjiževni izrazi, arhaizmi, provincijalizmi, regionalizmi, lokalizmi i sl.
BESEDA
KRSTIJANSKA I NIGDANJA
sam sobun se pitan
smirun i samor va sebi
je još živa ka dušica
da more razumit ove pivanje
na ovin divanu volari i mežnjari
da još ki god more zavolit riči
na ovin zajiku sirotic i težakinj
ča još komu ta beseda
krstijanska i nigdanja
more bit kakov sinj
ča još je takov kakov ki
va koj od naših plovanij