Piše: J.O.Hrvatin
Rika je nogometni prvak Hrvatske 2025.
Prvo ča san pomislil je veselje ljudi ki su vervali, šli i navijali, mlado i staro.
Mislin da je najveća vridnost da matere i oce ni strah peljat tamo dicu, na bilo ku utakmicu. Tako mislin na drage nećake i njihove prijatele pa na Francescota Squarciju i njigovu pjesmu Ajmo Rijeka forza Fiume. Čul san da je Francesco, nikadanji junior Rijeke, čera prišal z Rima da bi danas mogal bit na Rujevicu. Sada se domišljan i na naše Paščane Nenada Smajilu, Andrijovega ki je mlad jigral za Rijeku i na Rankota Buketu tudi,bil je i trener u Riku, a Paščan je.
Kada smo tata i ja šli z vlakon zas Šapljan na Zamet-Baredice vidit stan, smo na noge šli doli na Kantridu. Jigrali su 26. 3. 1960. leta Rijeka i Hajduk 1:1.
Danas ne gren, neka mladi pohajaju ki će i more. Ostali su mi radio, televizija i laptop pa ipak pratin. Ja, i jedan kafić zdola nas, nikih pedeset metri, tamo je vavik šušur kada gledaju Riku ali Hrvatsku.
Kada daju gol, ko gledan prenos na TV, čujen udzdola veselje i ku petardu, a malo pozatin kih pet-šest sekund, vidin da je zapravo bil gol. „Kriv“ je signal ki meni na TV pride kašnje pa oni prvi vidiju da je gol. Već san se navadil pa ko „zavragaju“ navijači zdola nas, zajno z već pozornosti pogledan ekran.
Slično je bilo danas 25.5.2025. Gledal san Šibenik-Hajduk, žalosno slabu utakmicu ma najedanput udzdola nas je zagrmila „raketa“ pa još jena. Morda je ča novega? Dobro san pomislil, naši su potrefili,1:0 je.
Gledan dalje ma da je 1:1, govori komentator z Šibenika. Nis ga već čul da je poništen gol Slavenu. Poluvreme je pa san šal protegnit noge po stanu, pa na balkon, pa u kambru.
Udzdola balkona je opet ruknilo. Kada to čujen se domislin da smo užali škercat u lov „ne pucaj, naši smo“.
Ma rukajte naši i hvala van da se veselite malo i namesto mene. Samo jimite pamet, čuvajte jeni druge i rukajte u zrak, a ne drugamo.
Uve dane će bit more slik pa neću dodavat soje. Morete pogledat dvi z mojega „foto vremeplova“, prva na slet na Kantridu za Dan mladosti, na današnji dan, a druga gol z jedanaesterca „Vojvodini“ kega je 1985. leta dal Damir Desnica. Slikano je zduga ma dokument je dokument, kakovgod bil.
