U Pasjak, na kraj sela mičkina hiša stoji,
z ružu i z vrton na Ulicu kunfin je deli.
Kamik na kamik je škrbno položen,
i po dugih letih još vavik je složen.
Na okna su jerte i škure zaprte,
sunca već dugo na fernike ni.
Zalokotana vrata davaju znat,
da uvanju ni dugo bil nidan prespat.
Na strihu još vavik dimnjak stoji,
ma dim se ne steže aš ninega ni,
ki uganj bi zložil, teplinu storil
i domu življenje opet ulil.
Z nonu Pepu, ki se je uvanju rodila
još drugu je Zuličinu dicu zgojila.
Jože, Cvetko, Tonka i Marija, si su skup čez hišu pasali,
i jedan za drugin se u svit pobrali.
Tako je sada ostala sama,
kodabi stara, siva, zapušćena dama,
ki čeka na vrime, ko će morda prit,
da uvanju počne novo življenje klit.
Besede: mičkina hiša– kućica; ruža – vinova loza pred ulazom; kunfin – granični kamen; kamik – kamen; škrbno – brižno; vavik – uvijek; jerta – kameni okvir oko prozora; fernik – zavjesa; zalokotano – zaključano; zložit uganj – naložiti vatru; pobrati se – pokupiti se; klit – klijati.
Pasjak, 07.09.2025. Autor: Nenad Smajila, mag.arheol.