Piše: J.O.Hrvatin
Kada pasa Antonja, u Šapljane počnu pusni dani. Kako je nikada bilo su Šapljanci govorili po soje.
Jožić Turković-Kranjčov: “U Šapljane je Crikva sv. Antona i slavimo Antonju, ti dan su bili gosti, je shod. Počeli smo pustovat potlje Antonje. Stari su se vavik mačkarali, mi smo ljudi ud munješćine, smo bili doma pandiljak, torak, sredu -ljudi su šli z vlakon na delo se opravdat i na 9 ur su prišli doma. Nikada san tri dane biu doma za pust, nisan šau delat.
Kada su prišla dica nisi mogau, biš zgubiu dičji dodatak, smo šli na delo magari se pokazat, a na 11 smo prišli z vlakon nazad mačkarat se.
Je biu z Lipe Tone Lipljan, Iskra, je živiu ovde, šporgete je delau. Je imau volju i smisau za ča naredit. Sako leto je storiu mačkaru, čovika velikega morda tri metre, na drvene štule, on je biu nutra u njemu. Prvu mačkaru ku je storiu je bila “Jelica”- jena ženskica mičikina, je storiu udzada noge, sprida ženskica švohna z masku i fačolon. On je biu čovik od sto kil, biu je ubučen u kitlju i ruke su mu bile naprit priko nje. Zgledalo je da ta pupa, ta “Jelica” njega nosi.”
Franko Simčić- Picetov: “Meni je nona naša povidivala da je bila jena Lipajka tako mičkina da je mužu prišla do pazduha. Se je zvala Jelica. Bila se je uženila za visokega, niki Bruno da je biu, je znau jako na vorlice (usna harmonika) svirat, pa kada su žnju škercali, aš da je mičkina, da je jedanput zdignila kitljicu, pokazala rit, mudant se ni nosilo, pa da je rekla: ovde me bušnite, ja san se oženila.”
Dalje Jožić govori u ča su se ubukli:
“Ženske su imale fačole, smo ih zvali žijanski, kričavi, puni rožic, crljenih i črnih, ke su same naredile. Nase su ubukle bele svilane bljuze štikane i krila, su bile svečane, nisu jih nosile samo za pust. Su bile lipe mačkare. Krila su bila kot narodna nošnja munjska. Same su storile tu munjsku nošnju naša mama, Ida Pušnikova i druge ženske. U nedilju popodne su se šle po hišah pokazat. “
Muški su se uvako ubukli: klabuk razdrt, čin već je imiu škulj je biu bolji, jaketa rasparana, hlače, platno ud vriće, pa se nalisat, niki su bili već vrajži za se načrnit. Žensku su užali po ubrazu namazat, ni mogla uć.”
Mlaji smo počeli delat kamion i smo šli klatit. Kigod muški si je diu zgončić nase.
Franko: “Sako leto je bilo sniga do kolena. Poli nas je bila kovačija, ljudi je bilo zas sih kraji i niča mi je ud njih ustalo. Sam san se tudi mačkarau, je se zanimalo da ki je ti.”
Jožić: “Po dva pute na večer smo si minjali mačkaru, samo da nas ne poznaju. Uvako smo šli 1953.-1954.: najdi ženske čižme (cipele), niča poli nas, niča poli Vinožovih i san niča sklepau i donesau jenu mačkaru ka se je priko cele glave dila, z Italije mi je niki donesau, ja san imiu samo za žensku, za lipše se ubuć, koucete, po cesti smo šli šoto braceto h Aniti, poli Miletovkinih, h Picetovin, pa nazad po Via Bagula (nazvana po kravljemu izmetu-baguli) zas sanicami doli, pa gori h Štacjonu, čreda dice je hodila za nami – pa ala ki je, ča je, komoć je niki progruntau da su to Janez i Jožić Kranjčov.
Ja san pozabiu da san ubučen u žensku, san boršetu pozabiu zet pa su razumili ki san.”
Za pohajanje po Šapljanah i okolnih selih su povidali:
Franko: “Mlaji smo počeli delat kamion i smo šli klatit. Kigod muški si je diu zgončić nase.
Po večerih čaz ćedan, do pusne nedilje se je šlo po 2-3 po selu pobirat, a na pusni torak su po selu si šli pobirat. Skupno nas je šlo 30-40, mičkino i staro.”
Jožić: “Za pust, kad se pobira, smo bili sakakovi – ciganke, cingesar (kotlokrpa), vrag, medvid, bolničar, kuhar, šumski čovik, milicajac. Najveć san ubukau jaketu nopak, a ubukivau san se i u žensko.”
Franko: “Ja na pust gren, ja rečen da kraden z oči. Zadnjih let se vrnja puno nazda, prihaja na une navade, sto let nazda, da mačkara niča predstavlja.
Obavezno se je zaplesalo z gospodinju, posebno kada se je ubahajalo skupno. Se je reklo “ćemo jenu za ripu”- sada ne u hišu, bite nan ublatili, ma ja jišćen da se gre u hišu, nutra. Reče se da bolje da selo zgori, nego da navade propadu. Dešpete ne delamo, nikada nismo nič premaknili, ni nemir delali. Gospodinji je čast ko kapo žnju zapleše, to je sve za stare užance.”
Jožić: “Za muziku je bilo tako da je najveć biu jedan muzikant, po misec dan. Na muziku smo najprvo mislili. Muzikanta nan je bilo vavik teško nać, z bicikletami smo šli ponj na Bukovicu i na Zemun.
Muzikant Paulo, Istrijan, je biu fanj let z nami, i je rekau dajte mi ča ćete, a Bukovčan je iskau da mu se plati, žnjin je šlo “za d΄nar” ko ne, ne bi prišau. Prvo je svirevau Lapić-Josip Iskra z Lipe, naši generaciji već ne.
Potlje, kada se je hodilo z vozon i konji, je bila ruta Šapljane, Rupa, Jelšane, Dolinje h Pauli u voštariju pa nazda u Šapljane h Juhani, tu doli kadi je voštarija. Knez je imiu konje (Knezov zas Šapljan) . Vavik je bilo sniga, je konjon zliu vina u trubac pa smo šli, ljudi mladi i stari su bili skupa. Jeno vrime smo hodili s kurijeru, samo pusne nedilje. Dri je imau motor zas prikolicu. Driljovku, soju ženu, je jeno leto biu naložiu u tu prikolicu, pa su šli z motoron priko Ciburice u Ješane. Ni vidila da su njoj kitlju prijele špice ud kola, pa kada se je stala su njoj se svi počeli smijat, a ni znala zač doklje njoj nisu rekli, gola rit njoj se je vidila.
U Rupi smo pobirali i nan je bila saka druga hiša zaprta, je Frane Rošotov zašlatau koš na lipicu, morda je još ti koš tamo.”
Jožić: “Smo šli u Nokračine, a nazad smo se vrnjali priko Bistrca i da gremo priko Harij u Podgrad. U kamion smo storili kuhinju i dimnjak, se je kuriu, klabase smo kuhali. Prvo Podgrada, kadi je biu most, smo morali dimnjak znet da moremo pasat čaz tunel, pa u Račice i Starod, h Emici i Lojziću u voštariju.
Na pusnu nedilju, aš pusne subote su bile radne, smo najveć hodili u Nokračine, Lipu i Lisac aš je Šapljanka Kate Tišljarova živila u Lisac. Po Nokračinah smo pobirali, a u Lisac nan je gospodinja skuhala zelje, je bila južina. Po tih stazah gremo i danas u Nokračine, smo hodili i u Šušak, sada je rampa kriva da ne gremo.”
U Šapljane su prihajale mačkare ud Škalnice i Lisca.
Pusni pandiljak po starini je dan ubahajanja bližih okolnih sel, ali ne smiron u isto selo. Šli smo i u Pasjak. To za u Pasjak se je zapustilo. Tudi Paščani ne hodiju u Šapljane.
Jožić: “U torak na pust se je počelo pobirat po selu, poli Pušnikovih najprvo, tamo je bila butiga, vavik se je dobilo fanj kus špeha, a za užancu su nan dali i klobase, jaja, pancetu, špeh, nabodeno na drat (žicu) pa gledat čigov je deblji, ki je veći kus špeha dau.”
Si su potrdili da je zas Pasjaka vavik prišal Pepo Iskra, Kolar, ali Paščani skupno ne.
Na Pepelnicu ujutro su od slame ali krp storili pusta, ubukli u ponošenu robu ali tutu, ubuli u znošenu obutvu. Popodne su storili povorku, hodili po selu, niki ubučeni kot pop, a u črno ubučena užaljena familija, jokali i skladali (narekivali). Pust je kriv pa su ga tukli z punju i palicu, a Stara je glasno glasno jokala.
Franko: “Za Pepeunicu se je z lugon u kaucetu posipalo (zato i je pepelnica), pogreb je biu prav kot za živega, bili su ljudi ki su jokali, narekivali. Pusta se je delalo ud slame i zapalilo na Pepelnicu nikadi u selu, ali na kraj sela. Jeno leto smo imali živega pusta, je biu Lajko, a Nevio Simčić i mi smo ga nosili na lojtrnici.
Jeno dva leta, naš utac je storiu da se pusta pošlje ća u izgnanstvo, z vlakon, kupili su mu kartu na Štacjon, zavezali na vagun pa je šau ća za Pivku.
Za vrime Italije nisu pustili da se ljudi mačkaraju, Talijani su se bali sami sebe.”
Pusni heci (šale)
Govori Franko da “kega smo imali na pik, ki je morda biu star za umrit, ma za lovit nas je biu dobar, temu smo za pust zavezali kljuke da ni mogau van, pa smo mu kričali po nadimku, a on za nami – ej pasja vira, a van ne more. Jeno leto smo mu z drekon namazali kljuke.”
Miho Jivešinov z Mun ki je bivau u Šapljane potlje paljevine Mun, 1944. je biu za mačkarat se i hecat. Plesi su bili poli Lovrićovih i poli Juhane, potlje poli Jurce (voštarije), obavezno je bilo “ala ples za mačkare.”
Samo san u Šapljane zapisal da se je divojku ka na ples ni tila plesat zapiralo u gajbe, (to za vrime Italije). Ka je jimila frajara je lahko odbila.
Svjedoči Franko: Gajbe su se delale potlje oslobođenja 1945., mi smo služili uz gajbu ka je bila ustala ud plesa, pa smo je koristili za pust, ženska u gajbi je bila interesantna, voljena, a biu je gušt dit lipu žensku u gajbu. Dešpet je biu i ljubomora – nisi tila plesat z manu, pa moraš bit u gajbu.
Jeno vrime su Šapljanci pepelnicu držali za ženski dan. Ti put su i starije ženske munjesale, ko i nisu z mačkarami pohajale.
Pusna hrana: obavezno štruklji i to samo za pust, i krofe. Kad fine pust su u oštariju storili fritaju ud pancete, jajc i klabas, a na pepelnicu samo kuhana jajca, aš je već bil posni dan.
Po vino u Riku
Jožić: Jeno leto za pust je oštarija bila zaprta aš je Juhana oštarica bila ubolila. Po vino za pust smo šli nas 5-6 z vlakon u Riku, na Brajdu su bila Porečka vina. Jimali smo zas sobu bačvicu ud sto litar. Delau je Emilio. Pitali smo črno vino i ni nan ga tiu prodat i da neka zamemo belo. Rekao san mu po talijansku da zač mora. Niča smo mu dali u žep pa je prodal ma u temu pogovaranju je vrime pasalo i vlak je na sedan i pol šau ća. Drugega ni bilo do pol noći. Odnesli smo bačvicu u garderobu na željezničku stanicu i rekli jenemu ki je tamo delal da neka pije koliko će samo da neka ne diva vodu nutra, a mi smo šli u kino Partizan. Bil je film Najveća predstava na svijetu.
Bili smo mladi i jaki i da ne bi kondukter vidil smo bačvu čez okno dili na ti putnički vlak i pokrili z jaketu. Okoli dvih za pol noći smo prišli u Šapljane. Minjali smo se za nosit to vino. Bačvu smo zas kanopon vezali za kolac tri metre dug i je nosili.
Potlje nan je bila Tonka, namesto Juhane, z oštarije prodala još sto litar, zas karijolu smo je vozili, tako da se je tega pusta popilo dvisto litar vina.
Povidali su: Jožić Turković-Kranjčov, r.1936., Šapjane 37 B; Franko Simčić-Picetov, r.1938, Šapjane 14; Karlo Komen z Brc, r.1936, Šapljane 31-Štacjon; Sušanj Radoš, r. 1959, Šapjane 37b; i Dominik Simčić, r. 1966, Šapjane 73.
Snimil na diktafon za u Zbornik Liburnijskog krasa, 2011.- Pusni običaji, J.O.Hrvatin