Piše: Darinka Martinčić
Na Antonju su i ovo leto na pal pul Tumpić, pred oštarijun i butigun, da ga si vide, obesili Pusta. Ma ča pusta – pustinu i sramotinu!
Lažjivca i rugjivca, drogeraša i kurbešinu, politikanta i tatinu…
Judi su zajeno malo na se prišli. Postali su slobodneji, veseleji. Moru se maškarat i kumedijat, moru bit ča te i delat ča te. Pune su maškar place i ceste, na se strane su tanci i fešte.
Pul nas va Leprince užanca je da kunpanije maškar na Pusnu nedeju, na Pusni pundejak i na Pust redu od kući do kući i va ta zadnja tri dni pusta obajdu su Leprinašćinu.
Drži se još vavek stara užanca da bude doma neki od kući ki će dočekat maškare z odprtemi vrati. Se se neč zbudi i gane va čoveke kad je va sele čut armuniku i veselje. Kunpanije svoja obahajanja fine večer va Sale na pusneh tanceh. Kako i h kućan, tako i va Salu pride najprvo kapo z majon od javorike okrunjenen z kurdelicami, za njin redu sopci pa složno, va pareh, se druge maškare. Sopuć i kantajuć store nekoliko krugi po Sale pa nastave tancat i zabavjat se.
Okole pohajaju i jaja pobiraju četire kunpanije, a to će reć ovako: Od vavek okolo hode muži – se sami štimani judi!
Za njimi su se odpravile i žene, aš ča su pak one! Da njin se ne mešaju stari, posebe re omladina i mladi pari.
Najnoveja i sako leto brojneja, to j kunpanija va ku moru poć si pa se zovu Zmešani!
Škoda bi bilo ne povedet da se va pusno vreme Leprince još tega dogaja, a to su dečji maškarani tanci, da se od mićega takaju, a zbudili su se i sako su leto boji i moćneji Leprinački zvončari.
Nekada se ni pusta obešalo na pal, nego j visel na balkone od doma, a kad su bili tanci, sedel je na pozornice. Na dan Pusta, na pol noći bila je užanca sokrit se, znet z sebe maškaru, zet pusta i poć ga zakopat. Koliko j bilo judi na tance,
tolik je bil i sprogod. Kad se j prišlo do ponapred skopane škuji, počel je „plač i narekovanje.“ Poveda se da je bil slučaj da j od vele žalosti i preveć pijači skupa z puston frknul va jamu i oni ki ga j nosil. Na zadnjen je se finilo tako da se j va
Sale storil još jedan, zadnji tanac „za repu“!
I na, vavek nekako prebrzo pride kraj temu pustu. Si grehi su popisani, se grde i nespodobne stvari zapisane. Za sud va našoj Sale si smo parićani! Na prvu sredu pusta se posede pred ozbilni i pravi judi ki te po pravice storit svoje delo. Ako bi rabilo, tu su i duhtor i plovan. Stvar zamu v ruke albukati, pa ki će po ken boje prat. Za sen ča publika na zadnjen vavek drži i navija za pusta, pravda ipak pobijedi, pa na meste kade j visel, skupa z puston v oganje zgori se ča ni vajalo. Judi se vrnu va „sudnicu“, razmenjuju još malo dogajanja va zadnjeh šetemanah i uživaju va delicije ku parićaju naše pusne ženske – fritaja za seh!