Piše: Nikoleta Morićeva
Neki daju fritule, a mi smo doma vavek delali puhanci. Ma da je bilo i pet zdel puneh, bimo mi dečina se pojili. A frigat, ni se jako nikemu račilo pa bi to najveć delale naše vele ženske. Ako bi deca pomagala, bi na sure puhančići obrnjali i muški i ženski. Ni trebal ni svetac, ni rojendan. Bil je dosta i lep dan, subota al nedeja, bi se puhanci frigali. Dobri su po lete, aš se ne pali peć, a boji su lego kolač.
Ča su puhanci boji od fritul? Niš nisu boji, tr je već dela okol njih. Ma kad ih va ruku primeš, moreš šćapac zet i letet vanka z plenon. Zdignjeno testo z kvason se razmesi, pak se z nožen al z kolon režu štapići al kocke. Štapići se moru slagat kako ćete – va kolo, va osmicu, al kako se ki zmisli. Friga se va vrelen uje, pospe z štaubon, i ji. Ki neće slatko, more jih jist namesto kruha.
Evo kako j’ recept za puhanci zapisala Jelka Žilić va knjige “Va kotliće zmešano”. More se testo storit i kot za boji kruh, al pogaču, pa će još boje bit.
Trebe nan:
okolo kilo muki (mehke)
2 suha kvasa al’ kockica friškega
mjašne vodi koliko rabi
žličica soli
uje za friganje
Muku prosejemo na dasku, pomešamo z suhen kvason. Ako imamo friški kvas, stavimo va kikaricu mjašne vodi i žličicu cukara. Razmrvimo nutra kvas, i posipamo z žlicun muki. Neka se kvas zdigne,. lejemo ga va jamicu od muki i dodamo tuliko osojene vodi koliko testo pita (more se i mleko let). Zamesimo dosta mehak hlepčić i pustimo ga pokrivenega z teplen tavijolon da se dobro zdigne (duplo). Rastakamo hlepčić na debjinu prsta, narežimo na kvadrići i pustimo još deset minuti da se zdignu. Steplimo uje i stavimo kvadrići frigat tako da del ča j bil obrnjen zgora položimo zdola na uje. Malo potresimo suricu, i kad se zažute, obrnimo. .Brzo su frigani. Stavimo jih na karteni tavijol da se ocede i još mjašne stavimo na stol. Puna jih je vela zdela.
