Piše: Sonja Vlah
Matujska okruglica, dvajset let od kako je osnovana Udruga umirovljenika i starijih osoba općine Matulji, proslavljena je va Hangare pul Matuj.
Ni ga ki ni bil, tako bi se moglo po starinsku povedet. Kupovneh slatkarij ni bilo aš su naše „penzice“ spekle se kako ča daju doma za se. Neke su tako pekuć dan prvo suboti dočekale i pol noći. Slašćicu – slavljeničku tortu prnesla nan je i općina.
Judi su popunili saki centimetar, bilo ih je od ulazneh vrat do poneštar na drugu stran, va dvorane. „Brojač“ ih je nabrojil dvesto i malo preko.
Počelo je z minutun posvećenun članon keh već ni. Voditeljica Nina Dukić Srok nan je pročitala o osnivanju i delu Udruge najprvo od 2006. do 2010. leta pa kašneje u dva puta od 2010.do danas. Tega je bilo za čut pa je publika sako malo zapljeskala.
Najveć smeha su storile Klara Lazar, Vlasta Šepić i Nada Dubrović ke su odglumile igrokaz „One tri“ o treh ženskah
ke se hvale i lementaju o življenju. Vokalni žensko-muški sastav, njih petnajst, su vježbali program par meseci.
Posložili su se pred pozornicu za stolon tako da ih publika se vidi. Med njih je, kot i saki put, rada prišla naša počasna članica Nevia Rigutto.
Klapa „Skalin“ je otkantala poznate klapske pjesme, a za čestitku dodala još jenu.
Pred kraj su na pozornice članice i člani plesne skupine otplesali ča ča ča. A kada je harmonikaš počel svirat starinsku pojku su naši Rukavčani Žigulići z gušton tancali, se zna, potresujku.
Podelili smo zahvalnice Klaudiju Jeleniću, Gordani Turza i Frankotu Rusu, a Emilu–Milanu Šaini i Bruni Šeškar posmrtno.
Zadovoljni smo da su nan prišli z udrugi Viškovo, Jelenje i Kastav i s ten nan je sen bilo lepše.
Od publike rabi još reć da su bili i judi keh je retko videt ma su aš je i to znak koliko njin naše druženje vredi. A mi smo na se ponosni.
Ponosni smo i da smo jedini ken su na slavlje prišli judi z više stranak matujske općini. I oni će bit jedan dan penzići.
I kada su ki spićevali kako je bilo, najboje bi se moglo reć ovako – ni ča nego po pljeskanju zadovoljneh judi zaključi sam.
