Piše: Nikolina Morićeva
8. mart je pasal, ma ka barufa okol njega! Ni bilo praznega stola va restoraneh, aš su muški morali pokazat da su rodno osviješteni, da štimaju svoje ženske i da neće zavragon dat da njin žena za 8. mart stoji pul šparheta. Se j’ bilo puno šipkeh, aš se mora i rožica pod nos zabost. Ka mlaja j’ dobila i kakov nakit, ka stareja j’ ostala i prez obeda, i prez rožice i prez čestitki. Judi su k večeru marširali po gradeh i zijali da su ženska prava još vavek nigdere, da jih muški maltretiraju na sto mileh modi, da imaju manje plaće, niš vremena za počinut, a duhtora moraju čekat leto dan, kot deda Mraza.
Barufa j’ pasala, a se j’ ostalo isto. Va restoraneh je mesta koliko ćeš, šipki će durat još do jutra, a ženske više niki ni ne abada. Do k letu, i novega 8. marča, neće se, budimo realni, promenit niš. Ma mora se reć da j’ današnja mladost lih malo drugačja, pa će morda za ko desetljeće posložit svet malo boje lego ča j’ danas. Morda j’ to bedasto, ma moramo bit malo optimisti. A do onda, jena prigodna z društvenih mrež, ka govori se, i više od tega:
Ča prava ženska mora imet:
celulit, kapić viška na bokih, trbuhu i riti, podočnjaki, kad se zbudi frizuru bog nas očuvaj, prištić na nosu, oklembešene cice, malo krecaste i dlakave noge, ožiljki od pegle, šparheta i peći, magar jene gaće do pod cic, par rasparaneh hulahopk i raspareneh kopic ke nikako da hiti, magar jenu škujicu na zube, jedanput na šetemanu napad histerije, razvučenu, zipranu trenerku i maju “za po kuće” i “sej na mene za pet” stav.
Inače, nit je žena, nit je prava, nit postoji. Zato vesele i zdrave vi meni bile😘😉.I ne samo danas leh neka van je srićan saki dan…
